Ekspertët britanikë e shqiptarë, të cilëve u është besuar kryerja e procesit të akreditimit të universiteteve në Shqipëri, kanë dorëzuar pas një pune 8-mujore raportet paraprake për 6 universitetet e para në vend. Sipas ekspertëve të ENKAS, vlerësimet kanë qenë pozitive, por nuk kanë munguar edhe rekomandimet.
Me dërgimin e një drafti të vlerësimit të jashtëm të IAL me datë 30.11.2016 thuhet se: “ Pas përfundimit të procesit të vlerësimit në kuadër të akreditimit për gjashtë Institucionet e Arsimit të Lartë (IAL) e para që kryen këtë vlerësim me ekspertë nga Agjencia Britanike për Sigurimin e Cilësisë (QAA) dhe ekspertë vendas, me asistencën e Agjencisë Publike të Akreditimit të Arsimit të Lartë (APAAL), në datën 30.11.2016, institucionet janë njohur me draftraportet finale të vlerësimit.
Në lidhje me këto draft RVJ, deri në datën 7 Dhjetor 2016, priten komente nga institucionet përkatëse ndërsa finalizimi i tyre dhe dërgimi për shqyrtim në Këshillin e Akreditimit do të bëhet vetëm pas përmbylljes nga Grupi i Vlerësimit të Jashtëm bazuar në komentet e institucioneve. Publikimi i raportit dhe rezultateve të akreditimit do të bëhet në faqen zyrtare të APAAL vetëm pas marrjes së vendimit të Këshillit të Akreditimit dhe daljes së aktit zyrtar të akreditimit, ashtu siç parashikohet në Manualin për vlerësimin e institucioneve, 2016-2017”.
Raporti përfundimtar për 6 universitetet e parë do të dalë në fund të muajit dhjetor, e më pas do t’i dorëzohet bordit të Agjencisë së Akreditimit që do të vendosi për akreditimin e këtyre institucioneve të arsimit të lartë. /tesheshi.com/
