Partia qeverisëse në Turqi nisi dje zyrtarisht fushatën për referendumin e 16 prillit mbi reformën kushtetuese, duke u kërkuar qytetarëve një “Po” të madhe për kalimin nga një sistem parlamentar në një sistem presidencial.
Hapja e fushatës nga AKP-ja, Partia për Drejtësi dhe Zhvillim, u bë me një ceremoni gjigande në praninë e rreth 40.000 të pranishmëve që kishin ardhur në Ankara nga e gjithë Turqia.
Kryeministri i vendit, Binali Jëlldërëm, mbajti fjalën e rastit, ku theksoi se sistemi presidencial do të jetë zgjidhje për problemet që po kalon vendi.
“Zgjedhja jonë për një Turqi të fortë dhe për stabilitet të përhershëm është ‘Po’,” do të thoshte ai mes entuziazmit të sallës.
“Ndryshimet kushtetuese që po i kalojmë për një votë popullore do ta përmbushin punën e pambaruar të nisur në 2007-n. Në fakt, një hap i rëndësishëm për sistemin presidencial u ndërmor në vitin 2007. Ky ndryshim është një mundësi historike për vendin tonë.”
Rruga e AKP-së për ndryshimin e kushtetutës së Turqisë ka bërë një rrugë të gjatë, dhe ka qenë një synim i hershëm për t’i dhënë fund një periudhe të mbushur me paqëndrueshmëri, me grushte shteti e me qeveri koalicioni që kanë sjellë veç dëme. Miratimi i ndryshimeve kushtetuese në parlament dhe dërgimi i tyre në referendum është për meritë dhe të MHP-së, partisë nacionaliste në opozitë, që e ka deklaruar hapur votën “Po”.
“Sistemi i ri do t’i japë fund terrorit, ka për ta çrrënjosur atë. A mendoni se PKK-ja, DAESH-i dhe FETÖ-ja e bëjnë kot tellallin e fushatës ‘Jo’? Eshtë e kuptueshme, sepse ky ndryshim i shkatërron ato,” deklaroi Binali Jëlldërëm. /tesheshi.com/
