Binali Jëlldërëm do të jetë kandidati i vetëm i Partisë për Drejtësi dhe Zhvillim për postin e kryetarit të saj dhe atë të kryeministrit të ardhshëm në kongresin e jashtëzakonshëm të 22 majit.
Ai kryen aktualisht detyrën e ministrit të Transportit, të Çështjeve Detare e të Komunikacionit në qeverinë e kryesuar nga Ahmet Davutogllu. Jëlldërëm e ka drejtuar dhe më herët këtë dikaster, thuajse gjatë gjithë periudhës së qeverisjes së AKP-së. Po ashtu ai ka qenë deputet që nga viti 2002.
Kandidati i saposhpallur është një prej bashkëthemeluesve të AKP-së. Ai kandidoi në zgjedhjet lokale të 2014-ës në Izmir. Por Binali Jëlldërëm nuk arriti të fitonte e ta drejtonte bashkinë e Izmirit. Me 35.9 për qind të votave, ai u rendit i dyti, diçka e pritshme në një qytet të cilin opozitarët e majtë republikanë të CHP-së e kanë fortesë të tyre.
Emrin e tij si kandidat i vetëm në kongresin e 22 majit e bëri të ditur zëdhënësi i AKP-së, Omer Çelik, që deklaroi se zgjedhja e këtij kandidati ishte rezultat i konsultimeve në të gjitha nivelet e partisë, si edhe i një sërë anketimesh.
Pritej që Jëlldërëm të caktohej si kandidat, ndërsa ai ishte mes pak emrave të parë si të përshtatshëm për postin e kryetarit të partisë dhe të kryeministrit të vendit.
Ahmet Davutogllu do të lajmëronte në fillim të këtij muaji se do ta linte drejtimin e partisë, e po ashtu do të dorëhiqej dhe nga kryesimi i qeverisë, duke njoftuar për mbajtjen e një kongresi të jashtëzakonshëm, i dyti në historinë e Partisë për Drejtësi dhe Zhvillim. /tesheshi.com/
