Ndërsa dhuna izraelite përshkallëzohet në territoret palestineze, 343 akademikë britanikë kanë vendosur t’i bojkotojnë universitetet e institucionet e tjera arsimore izraelite në shenjë proteste.
Ndalimi i bashkëpunimit me shkollat izraelite është një përpjekje e këtyre akademikëve për të tërhequr vëmendjen për shkeljet e ligjit ndërkombëtar nga Izraeli.
Në njoftimin e tyre thuhet se ata nuk do të pranojnë ftesa për t’i vizituar institucionet akademike izraelite, e nuk do të marrin pjesë në konferencat e financuara apo të organizuara prej tyre.
I nënshkruar prej të 343 akademikëve, në shpjegimin e shkruar të vendimit të tyre deklarohet se: “…ne jemi thellësisht të shqetësuar nga pushtimi ilegal prej Izraelit i tokës palestineze, nga shkelja e patolerueshme e të drejtave njerëzore…”
Mes të tjerash, ata shprehen të vendosur në vijimësinë e qëndrimit të tyre, “Kemi për ta mbajtur këtë qëndrim derisa shteti i Izraelit t’i përmbahet ligjit ndërkombëtar, e të respektojë parimet universale të të drejtave njerëzore.” /tesheshi.com/
