Sipas stacioneve matëse të Ministrisë së Ambientit Jetësor niveli më i lartë i përqëndrimit të grimcave të dëmshme PM10 dhe PM 2,5 është shënuar në Tetovë, Veles, Kërçovë, Gazi Babë dhe në vendbanimin Rektorat.
Mjekët japin alarmin mbi gjendjen e rëndë dhe pasojat që kanë grimcat PM10 dhe PM 2,5 në shëndetin e njerëzve. Në shënimin e Ditës Botërore të luftës kundër sëmundjeve kronike të mushkërive, mjekët thonë se numri i të prekurve shënon rritje nga viti në vit, e ndër shkaktarët më të mëdhenj të përhapjes së kësaj sëmundjeje është ndotja e lartë e ajrit.
Nga Instituti i sëmundjeve të mushkërive dhe tuberkulozit, shtojnë se rastet më të shpeshta që paraqiten për të kërkuar ndihmë nga sëmundjet e mushkërive janë nga qytetet me nivel më të lartë të ndotjes.
“Njëra ndër shkaqet e paraqitjes së kësaj sëmundjeje është ajri i ndotur, pirja e duhanit dhe alergjitë, këto janë në rritje posaçërisht nëpër qytete ku niveli i ndotjes së ajrit është i lartë në mënyrë të vazhdueshme. Këto sëmundje theksoj vijnë si rezultat i alergjive, ndotjes së ajrit, dhe pirjes së duhanit”,– tha Predrag Bozhickoviç, Drejtor i Institutit për sëmundje të mushkërive dhe tuberkuloz.
“Të gjithë e dimë sa është niveli i ndotjes dhe grimcave të rrezikshme në ajër për këtë periudhe në veçanti në qytetin e Shkupit, gjë që ndikon në përkeqësimin e gjendjes së personave të prekur nga kjo sëmundje. Të gjithë ato materiet e dëmshme të cilat njerëzit i thithin përmes sistemit respirator dhe pas depërtimit në rrugët e frymëmarjes fillojnë komplikimet shëndetësore”,- tha Biljana Ilievska, Shoqata e Pneumologëve të Maqedonisë.
Por kush është shkaktari më i madh për ndotjen e ajrit? UNDP në Maqedoni ka bërë një hulumtim.
“Për t’u gjetur zgjidhje për problemin e ndotjes së ajrit fillimisht duhet të dihen shkaktarët. UNDP ka bërë një hulumtim nga e cila del se ngrohjet e amvisërisë janë ato që marrin 30% në ndotjen e ajrit, ndërsa me 20% transporti, industria dhe ndërtimtaria. Shpresojmë që gjetjet e këtij hulumtimi do të ndihmojnë në gjetjen e zgjidhjeve të vërteta për tejkalimin e problemit të ndotjes së ajrit”, Luiza Vinton, UNDP.
Prej masave konkrete që duhet marrë komunat kundër ndotjes së ajrit, veçon ai i drejtuesve të Shkupit që të stimulon qytetarët për blerje të sobave me peleta, duke jua kompensuar një pjese të shpenzimeve.
Përgatiti: Miradie Hasani – /tesheshi.com/
