Shtetet e Bashkuara të Amerikës janë një mik jo i besueshëm dhe Iraku nuk duhet të lejojë praninë e ushtarëve amerikanë në tokën e tij, i tha udhëheqësi suprem fetar i Iranit, Ayatollah Ali Khamenei, presidentit irakian Abdul Latif Rashid.
Irani mban lidhje të forta me Irakun dhe kundërshton praninë ushtarake amerikane në Irak dhe në vendet e Gjirit Persik, sepse ndërhyrja ushtarake perëndimore është shkaku i pasigurisë në rajon, transmeton Reuters.
“Amerikanët nuk janë miqtë e Irakut. Amerikanët nuk janë miqtë e askujt, kështu që ata nuk janë besnikë as ndaj miqve të tyre në Evropë”, citoi media shtetërore të ketë thënë Khamenei.
Agjencitë e sigurisë kombëtare të SHBA-së po hetojnë rrjedhjet e dokumenteve të klasifikuara që sugjerojnë se SHBA ka spiunuar aleatët, përfshirë Ukrainën.
“Prania e qoftë edhe një amerikani në Irak është e tepërt,” i tha Khamenei Rashid-it, i cili mbërriti për të vizituar Teheranin me një delegacion për të forcuar lidhjet midis dy vendeve fqinje.
SHBA ka rreth 2500 trupa në Irak që këshillojnë dhe ndihmojnë ushtrinë vendase në luftën kundër ISIL-it.
“Iraku dëshiron të thellojë marrëdhëniet me Iranin dhe të zgjidhë disa çështje të mbetura midis dy vendeve,” tha Rashid, pa iu referuar lidhjeve Irak-SHBA në deklaratë.
“Prania amerikane prish sigurinë e rajonit”
Iraku dhe Irani shkuan në luftë për tetë vjet në vitet 1980, por marrëdhëniet midis dy vendeve me shumicë shiite u lehtësuan ndjeshëm pas rënies së Sadam Huseinit dhe regjimit të tij të dominuar nga sunitë.
Iraku është bërë një partner i rëndësishëm ekonomik i Iranit, të cilës i janë vendosur një sërë sanksionesh nga Perëndimi dhe furnizon Irakun me gaz dhe energji elektrike, si dhe me mallra të konsumit, shkruan AFP.
Agjencitë franceze kujtojnë se të dy vendet kontribuan ndjeshëm në fitoren ndaj ISIL-it në Irak, ku SHBA ka ende 2500 ushtarët e saj.
Amerikanët kanë rreth 900 ushtarë të tyre edhe në Siri, kryesisht në verilindje, e cila qeveriset nga kurdët dhe është pjesë e koalicionit të udhëhequr nga SHBA që lufton mbetjet e ISIL.
Flota e Pestë e Marinës Amerikane është e vendosur në Bahrein.
“Ne nuk e konsiderojmë të dobishme praninë e ushtarëve të huaj dhe të huajve në rajon”, tha presidenti iranian Ebrahim Raisi në një konferencë të përbashkët për shtyp me homologun e tij irakian.
“Prania e Shteteve të Bashkuara shqetëson sigurinë e rajonit”, tha Raisi.
“Marrëdhëniet tona me Irakun bazohen në interesa të përbashkëta dhe amerikanët mendojnë për interesat e tyre, jo për interesat e vendeve të rajonit”, përfundoi ai. /tesheshi.com/
