Me qëllim që t’u ofrojë një rehati më të madhe udhëtarëve të saj të vegjël, kompania e fluturimeve “Air New Zealand” ka prezantuar së fundmi një krevat të ri, që u lejon fëmijëve të rrinë shtrirë gjatë fluturimit.
Në vitin 2011, kjo kompani fluturimesh pati sjellë si risi krevatin “SkyCouch”, që formohej nga shtrirja e tri ndenjëseve ekonomike. Pavarësisht kësaj risie, fëmijët ishin të detyruar që të qëndronin në prehërin e kujdestarit kur ishte i aktivizuar sinjali i rripit të sigurimit. Tashmë, falë një paisjeje të re të projektuar për ta, fëmijët do të mund ta vazhdojnë pushimin e tyre pa u shqetësuar dhe pa ndërprerje.
Paisja e re, e ngjashme me një krevat portativ, është projektuar për fëmijë që peshojnë nën 18kg dhe që janë nën 110 cm. Ajo lidhet me krevatin “Skycouch”, kështu që edhe prindërit mund të shtrihen dhe të pushojnë ngjitur me fëmijën e tyre.
Menaxherja e Shërbimit për Klientin në “Air New Zealand”, Anita Hawthorne thotë se pritet që një risi e tillë të përdoret gjerësisht nga familjet që do të udhëtojnë me këtë kompani. Duke folur në lidhje me këtë, ajo shprehet:
“Futja në përdorim e ndenjëses në formë krevati “Skycouch” solli një ndryshim rrënjësor në kabinën ekonomike. Në fillim e ofruam atë vetëm për çiftet, por shumë shpejt vumë re se ishte e përshtatshme edhe për prindërit me fëmijë të vegjël.”
Tashmë, prindërit mund të pushojnë qetësisht, ndërkohë që fëmijët e tyre luajnë në hapësirën e sheshtë që është menduar për ta, pa shqetësuar pasagjerët e tjerë. /tesheshi.com/
