Ahmeti pas takimit me Hahn: mbështesim Zaevin dhe pa mandatin e Ivanovit

Pas Bilall Kasamit (Lëvizja BESA) dhe Ziadin Selës (Aleanca për Shqiptarët), eurokomisioneri Johanes Hahn dhe tre eurodeputetët Eduard Kukan, Ivo Vajgël dhe  Knut Flekenshtajn kanë realizuar takim edhe me liderin e BDI-së, Ali Ahmeti.

Ahmeti pas këtij takimi tha se e ka njoftuar Hahnin lidhur me zhvillimet politike në vend, ndërsa tek ata vlerësoi një interesim të lartë për daljen nga kjo krizë.

“Ata shfaqën një interesim të jashtëzakonshëm mbi zhvillimet dhe kërkonin mundësi se si mund situata të tejkalohet dhe vendi të kthehet në normalitet me institucione funksionale duke filluar nga Kuvendi deri tek konstitutimi i qeverisë.  Porosi, mesazhe ishin shumë miqësore që vendi duhet t’i tejkaloj të gjitha mosmarrëveshjet, dhe të marrim obligim të gjitha forcat politike në vend, deri në konstituimin e suksesshëm të institucioneve këtu në Maqedoni”, deklaroi Ali Ahmeti.

“Sigurisht që ne duhet të dialogojmë, sigurisht që ne duhet të kërkojmë zgjidhje për të mos e dërguar situatën deri në ato nivele dhe të dëshpërojmë miqtë tanë në këtë rast BE-në, sepse nuk do të ishte mirë për asnjë forcë politike as nuk do të ishte mirë për vendin tonë, por t’i grumbullojmë energjitë pozitive dhe t’i vëmë në funksion të zgjidhjes së krizës politike dhe jo të ngarkesave.Kjo krizë të zgjedhjet me mjet politike dhe të mos shndërrohet nga krizë politike në intra-etnike. Të gjithë duhet të investojnë në drejtim konstituimit të institucioneve dhe të funksionimit të tyre”, ka thënë mes tjerash kreu i BDI-së.

Ahmeti poashtu tha se BDI mbetet në qëndrimin për përkrahjen që e ka dhënë Zaevit dhe LSDM-së, duke theksuar se nëse është e nevojshme të votohet qeveri pa mandatin e Ivanovit, ata do ta respektojnë vendimin e tillë për të përkrahur LSDM-në.

I pyetur në lidhje me heqjen dorë nga Platforma Shqiptare ai tha se kjo është njësoj si të heqësh dorë nga Marrëveshja e Ohrit. “Kjo deklaratë po keqpërdoret për qëllime politike”, tha Ahmeti, që porsi të tjerë politikanë shqiptarë ka vendosur ta quajë deklaratë dhe jo platformë.

Në ndërkohë pritet që Hahn të realizojë takim edhe me liderin e LSDM-së, Zoran Zaev dhe atë të VMRO-DPMNE-së, Nikolla Gruevski. /tesheshi.com/