Ministri i Financave dhe i Ekonomisë, Arben Ahmetaj, e cilësoi aksionin kundër informalitetit si prioritet në 100 ditët e para të qeverisë Rama2. Në mbledhjen e Asamblesë së PS-së, ku të gjithë ministrat paraqitën prioritetet e punës së tyre, Ahmetaj tha se ky operacion synon edukimin e tatimpaguesve. Në këtë kuadër, Ahmetaj tha se në fazën e parë të operacionit është komunikuar me 13 mijë tatimpagues.
Sipas tij, në fund të 100 ditëve do të kemi gati ligjin e paketave për lejet dhe licencat. Gjithashtu ministri i Ekonomisë dhe Financave u shpreh optimist për rritjen ekonomike dhe uljen e borxhit. Ai shtoi se në vitin 2018 borxhi do të ulet me 2.2% të prodhimit të brendshëm bruto.
Ahmetaj parashikoi se rritja ekonomike në fund të mandatit të dytë qeverisës do të arrijë 5.5%, duke tejkaluar parashikimet. /tesheshi.com/
