Brenda pak ditësh pritet të çelet fondi për këstin e shtatë për ish-të përndjekurit politikë. Ky fakt u bë publik nga ministri i Ekonomisë, Arben Ahmetaj, gjatë fjalës së tij në Kuvend, teksa bënte krahasimin e investimeve dhe reformave të qeverisë aktuale, me atë të shkuarën që drejtohej nga koalicioni i së djathtës.
“Në 2010-ën keni shpenzuar për të ish-përndjekurit 1 mld lekë, ndërsa në 2016 kjo shifër është dyfishuar. Po hapim këstin 7-të në çeshtje ditësh”, u shpreh Ahmetaj.
Ai foli për një sërë reformash që janë kryer gjatë këtyre tre viteve të qeverisë Rama, sicc është pensioni social, rritja e pagave, apo financimi I reformës në drejtësi, që sipas tij është kryer për herë të parë.
“Pesioni social është fytyra e kësaj qeverie. Në vitin 2017 rreth 5200 pensionistë përfitojnë pesion social, që në botën tuaj do ishin pa para dhe të ardhura. Reforma në drejtësi, ne u fokusuam te financimi i saj, ka siguruar mjetet financiare që të kemi drejtësi të mirë dhe kjo u arrit për herë të parë. Ju e keni falimentuar shtetin dy herë. Rritja e pagave do të bëhet me rreth 10 % dhe trajtohen me diferencë policia e shtetit, mjekët dhe ushtarakët, kurse pagat e ulëta të administratës do të rriten me 36 për qind”, tha Ahmetaj.
Ministri foli edhe për mbështetjen e fermerëve, ndërsa i tha qeverisë së shkuar se nuk kanë financuar për këtë kategori as edhe një cent.
“Ju nuk i keni rimbursuar asnjëherë fermerët, tani ju bëni thirrje të mos riformalizohen, apo të mos hyjnë në ekonominë e tregut? Cfarë keni me fermerët, apo ngaqë nuk ju kanë votuar?”, tha Ahmetaj./tesheshi.com/
