Ministri i Ekonomisë dhe Financave, Arben Ahmetaj, deklaroi nga Vlora se brenda 100 ditëve të para do të ofrohen mbi 110 mijë dokumente online.
Ahmetaj tha se ofrimi i dokumenteve online do të lehtësojë ndërmjetësimin mes punëkërkuesve dhe sipërmarrjes.
“Këtu jemi edhe për të deklaruar atë që po bëjmë me derrugullimin. Janë 80 mijë vërtetime apo 30 mijë dokumente që lëshohen nga zyrat e shërbimit kombëtar me 3 tipologji. Ne shumë shpejt ato dokumente do t’i ofrojmë online, pra nuk do të ketë nevojë që të shkojnë në sportelet e shërbimit kombëtar të punës.
E gjithë kjo është në kuadrin e derregulimit, iniciativë e Kryeministrit për të gjitha institucionet në favor të shërbimit ndaj qytetarëve dhe ndaj sipërmarrjes.
Vetëm me këtë hap, vetëm me këtë lehtësim proçedure, vetëm me ofrimin e këtyre dokumenteve online, pra jo nëpër sportele, ne i shpëtojmë qytetarëve dhe sipërmarrjes 3,650 ditë pune. Pra 10 vite brenda 1 viti”, tha Ahmetaj.
Këtë deklaratë Ministri i Financave dhe Ekonomisë Arben Ahmetaj, e bëri në qarkun e Vlorës, ku vizitoi Zyrën e Punës dhe Qendrën e Formimit Profesional. /tesheshi.com/
