Autori i dramës së parë modern “Erveheja”, Ahmet Qirezi ka reaguar ndaj drejtorit të Teatrit Kombëtar të Kosovës, Agim Sopit i cili në një intervistë dhënë për një portal kosovar autorësinë e kësaj drame e ka bartur tek i ndjeri Muharrem Qena.
Qirezi thotë se me deklaratën e bërë nga Sopi është keqinformuar publiku, duke e quajtur manipulimin e parë që bëhet me këtë temë.
“Këto lloj manipulimesh primitive kanë kohë që janë lansuar nga njerëz të caktuar të cilët janë përpjekur të fshijne gjurmët që i kam lënë në dramaturgjinë dhe teatrin në Kosovë duke u përpjekur që autorësinë e Ervehesë ta bartin tek i ndjeri Muharrem Qena. Me këtë rast, deklaroj se as TKK, e as drejtori i saj, Agim Sopi, e askush tjetër, qoftë individ apo institucion, nuk mund ta tjetërsojë autorësinë e drames sime “Erveheja,” e inskenuar në Teatrin popullor krahinor në regji të Muharrem Qenës me 1966 dhe në Teatrin e qytetit të Prizrenit në regji të Fetah Mehmetit me 1985.
Dëshiroj t’ia përkujtoj opinionit publik në Kosovë, sidhe TKK-së se vënia në skenë e saj drame i nënshtrohet Ligjit mbi të drejtat e autorit dhe as Teatri Kombëtar i Kosovës e as ndonjë institucion tjetër privat apo publik, nuk do të mund ta vëjë në skenë Ervehenë si dramë, pa lejen time si autor i saj”, thuhet në reagimin e Qirezit.
Ai ka kërkuar nga redaksia e portalit KultPuls.com që ka botuar intervistën të largoi pjesën ku siç thotë ceohet e drejta e tij si autor i dramës “Erveheja”, përndryshe ka paralajmëruar se do të marr veprime ligjore kundër portalit në fjalë për ta mbrojtur dinjitetin e tij dhe dinjitetin e integritetin e veprës së tij.
/tesheshi.com/
