Menjëherë pas lirimit të tij nga autoritetet gjermane, gazetari egjiptian i rrjetit televiziv Al Jazeera, nuk i ka kursyer fjalët e mira për presidentin dhe kryeministrin turk.
“Unë falënderoj udhëheqësin e lirisë, jo vetëm për popullin e tij, por për të gjithë popujt e botës, Rexhep Tajjip Erdoganin. Ai ishte i vetmi udhëheqës në botë që më mbështeti ndërsa isha i ndaluar,” tha Ahmed Mansuri.
“Kryeministri turk, Ahmet Davutogllu, i telefonoi po ashtu dy herë avokatit tim për ta pyetur për situatën.”
“Faleminderit Turqi, faleminderit presidenti dhe kryeministri turk,” shtoi Mansuri.
Ahmed Mansuri u ndalua të shtunën në Berlin ndërsa po merrte avionin për në Katar, dhe u lirua të hënën nga zyrtarët gjermanë.
Gazetari bëri të njohur se arrestimi i tij u krye me kërkesë të autoriteteve egjiptiane, e tha se lirimi i tij ishte një goditje dhe humbje e madhe për administratën e es-Sisit.
Një gjykatë egjiptiane e dënoi vitin e shkuar Mansurin për torturimin e një juristi në sheshin Tahrir në 2011-ën. Bashkë me të u dënuan dhe dy anëtarë të Vëllazërisë Muslimane dhe një klerik. Gazetari i pati hedhur poshtë më herët akuzat ndaj tij, mes të cilave ai ishte përballur dhe me ato për përdhunim, për pengmarrje dhe plaçkitje.
Ahmed Mansuri ngriti lart dhe pavarësinë e gjykatave gjermane. “Ata nuk e pranuan shtypjen e një regjimi jashtë Gjermanisë dhe vendosën ta lirojnë Ahmed Mansurin.” /tesheshi.com/
