Drejtori i Institutit të Krimeve Kundër Komunizmit, Agron Tufa, ka kontestuar portretet e varura në bulevardin “Dëshmorët e Kombit”, vënë nga Bashkia e Tiranës në nder të atyre që ranë për çlirimin e Shqipërisë, e kjo në prag të 29 Nëntorit. Sipas tij, aty ka asish emra që nuk kanë rënë në luftë.
“Në atë varg portretesh kemi përfaqësues të sigurimit të shtetit, që janë vrarë me shqiptarët. Të rënë në luftë? Me kë? Mes tyre mund të përmendim: Hysen Micolli, është vrarë në vitin 1945 duke ushtruar terror vrasje edhe gjenocid në Malësinë e Madhe përballë luftëtarëve të Prek Calit; Nuri Luci është vrarë shumë vonë; Baba Faja Martaneshi është vrarë në sofër, sepse deshi që të prishë rregullat e fesë bektashiane etj. Edhe një pjesë e partizanëve janë vrarë në aspekte të përndezura civile e nuk kanë rënë nga okupatorët”, thotë Tufa, duke ironizuar më pas me arsyetimin se “përse nuk janë ekspozuar edhe portretet e Enver Hoxhës, Mehmet Shehut, Koçi Xoxes?”.
Për Tufën, “kjo është një hipokrizi e gjitha”.
“Unë mendoj se do të kishte dhjetëra forma për të kujtuar denjësisht Luftën Antifashiste, që nuk është kurrsesi pronë e komunistëve, sepse ka nisur që në 7 prill. Mendoj se kjo është forma më barbare e kësaj ikonografie, që i ka dalë boja në vite. Të gjitha ato portrete janë përzgjedhur nga volumet e ‘Yjeve të pashuar’, që hartoheshin me plotë gënjeshtra edhe pasaktësi”, ka theksuar njeriu i cili për paradoks, gjatë gjithë këtyre viteve është përplasur me instanca të një qeverisjeje e cila e paguan për të dokumentuar krimet e komunizmit.
Si qeveri e majtë, ajo pra financon një institut për të zbardhur të kaluarën komuniste, i pari i këtij lloji në 30 vite. /tesheshi.com/
