Pretendimet e ish-mjekut të ekipit kombëtar të Suedisë se Zllatan Ibrahimoviç ka marrë substanca të ndaluara kur luante për Juventusin kanë vënë në lëvizje agjentin e tij Mino Raiola.
Ky ka deklaruar se pretendimet e tilla janë qesharake, e se lojtari suedez që tani luan për PSG-në në kampionatin francez synonte ta padiste akuzuesin.
Ulf Karlsson do të deklaronte se Ibrahimoviç drogohej ndërsa luante për ekipin e Juventusit në vitet 2004-2006. “Zllatan shtoi dhjetë kile në gjashtë muaj gjatë kohës që gjendej te Juventusi. Mendoj se ai drogohej. Kështu më ngjan,” do të thoshte ai për Sport Bladet.
“Ne do ta padisim,” ka reaguar Raiola. “Ka gjithmonë njerëz që urrejnë. Mbase ai është një ish-sportist që ka dështuar, mbase është thjesht xheloz. Por ky njeri ka bërë një gabim të madh. Ai po përhap gënjeshtra.”
“Dopingu te Juventusi kishte marrë fund kur arriti Zllatani,” ka vijuar agjenti i futbollistit suedez. “Pretendimet janë të çmendura. Të tërë klubet ku ka qenë Zllatani e dinë se ai nuk përdorte as aspirinë.”
Ibrahimoviç është në muajt e fundit te PSG-ja, dhe destinacioni i tij i ardhshëm mund të jetë Premier Liga angleze. Ai humbi një 11-metërsh e shënoi një gol në takimin e mbrëmshëm çerekfinal të Champions League-s ndaj Mançester Sitit. /tesheshi.com/
