UNHCR-ja ka shprehur miratimin për planet e autoriteteve franceze për shkatërrimin e kampit të emigrantëve në Kale, të quajtur ndryshe dhe “xhungla”, duke deklaruar se i mirëpret ato.
“Vendndodhja e xhunglës ka qenë problematike për një numër vitesh, dhe UNHCR-ja e ka rekomanduar prej kohësh mbylljen e saj,” tha në Gjenevë zëdhënësi i agjencisë për refugjatët pranë OKB-së, Adrian Edwards.
“Kushtet e jetesës janë të lemerishme,” ka shtuar ai, duke nënvizuar mungesën e shërbimeve bazë në “xhunglën” e Kalesë.
Por UNHCR-ja ka shprehur në të njëjtën kohë frikën se fëmijët e pashoqëruar mund të trafikohen nëse nuk u vihet mjaftueshëm në ndihmë gjatë kohës së bartjes diku tjetër me prishjen e kampit.
Francois Hollande, presidenti francez, bëri një vizitë në Kale javë më parë, duke premtuar se “xhungla” do të mbyllej nga fundi i këtij viti. /tesheshi.com/
