Ndërsa kryeministri i Kosovës Isa Mustafa mburret se gjatë qeverisjes së tij është rritur punësimi i qytetarëve, statistikat e prezantuara së fundmi nga Agjencia e Statistikave të Kosovës, tregojnë se në vend shkalla e papunësisë mbetet ende në shifra alarmante.
Statistikat tregojnë se 32.9 për qind e kosovarëve janë të papunë.
“Papunësia më e theksuar është te femrat me 36.6 %, krahasuar me meshkujt, 31.8%. Punësimi me i lartë është te meshkujt, 38.7%, ndërsa punësimi te femrat është 11.5%. Femrat janë të punësuara, kryesisht në sektorët e arsimit dhe të shëndetësisë, me rreth 40% të tyre, ndërsa meshkujt janë kryesisht të punësuar në sektorët e prodhimit, tregtisë dhe ndërtimtarisë, me rreth 40%”, thuhet në raport.
Sektorët ekonomikë, që prijnë në punësim, vazhdojnë të jenë: prodhimi me 14.7%, tregtia me 14.4%, arsimi me 12.1% dhe ndërtimtaria me 9.5%.
Ndërsa, sektorët e tjerë marrin pjesë me përqindje më të vogël në punësim.
Shkalla më e theksuar e papunësisë është te grupmoshat 15-24 vjeçare me 57.7%, ndërsa shkalla më e lartë e punësimit është te grupmoshat 35-44 vjeçare me 36.2%.
Sipas rezultateve të ASK-së 2015, fuqia joaktive është mjaft e lartë, me fokus të veçantë te femrat. Sa i përket të punësuarve me kontrata del se 28% e personave të punësuar kanë kontratë të përhershme në punën e tyre kryesore, ndërkohë që 72% kanë kontratë të përkohshme.
Anketa ka pasur shtrirje në 600 qarqe regjistruese në tërë territorin e vendit, ku janë anketuar 4.800 ekonomi familjare, të përzgjedhura sipas metodës së rastit nga korniza e regjistrimit të popullsisë, ekonomive familjare dhe banesave. /tesheshi.com/
