Numri i fundit i veteranëve i dalë nga komisioni qeveritar ka arritur shifrën me mbi 46 mijë tillë. Në lidhje me këtë, dje reagoi kryeministri i vendit Isa Mustafa, i cili në mbledhjen e qeverisë tha se ky numër i tejkalon të gjitha parashikimet dhe qëndrueshmërinë buxhetore. Këtë numër nuk e kishte pritur as ish komandanti i përgjithshëm i UÇK-së, Agim Çeku, megjithëse sipas tij kjo shifër nuk e ngarkon buxhetin e shtetit.
“Është e vërtetë që ne e kemi pritur një numër më të vogël por ky numër nuk e ngarkon buxhetin, buxhetin e ngarkojnë vetëm ata veteranë që janë të papunë, sepse nuk do të thotë që 46 mijë veteranë janë pjesë e buxhetit, qeveria i paguan vetëm ata që janë të papunë, kështu që ky është numri që komandantët e kanë prezantuar në komision, ata e dinë dhe besoj se kanë punuar me ndërgjegje të plotë”, ka thënë Çeku për mediat kosovare.
Sipas tij, nuk do të thotë që UÇK-ja i ka pasur gjithë këta veteranë në një ditë por se ky është numri i qytetarëve të Kosovës që kanë marr pjesë në luftë në faza të ndryshme e shumica e tyre gjatë tërë kohës.
Mirëpo Çeku nuk e ka përjashtuar mundësin se në këtë numër ka edhe të tillë që nuk e meritojnë statusin e veteranit.
“Nuk e përjashtoj mundësin që në këtë numër ka veteranë që ndoshta nuk e meritojnë këtë status që iu ka dhënë, por ky numër besoj se është pakicë. Unë jam shumë kundër tendencave që të paraqitet UÇK-ja e vogël, të themi se ne pak kemi kontribuar dhe se neve na ka liruar dikush tjetër”, ka deklaruar Çeku. /tesheshi.com/
