Zëvendëspresidenti amerikan, Mike Pence, arriti në Seul të dielën, pikërisht në ditën që Koreja e Veriut provoi të kryente lëshimin e një rakete, por pa sukses.
Vizita e zëvendëspresidentit amerikan vjen në një kohë kur tensionet në gadishullin korean kanë njohur rritje, pasuar me një retorikë të ashpër të Koresë së Veriut.
Në një zonë të demilitarizuar midis dy Koreve, Pence do t’u thoshte gazetarëve se koha e durimit strategjik me Korenë e Veriut ka mbaruar.
“Ka patur një periudhë durimi strategjik, por koha e tij ka mbaruar.”
Të gjitha alternativat janë në tavolinë, do të paralajmëronte ai, ngjashëm me deklaratën e sekretarit amerikan të Shtetit, Rex Tillerson, që në vizitën gjatë muajit të shkuar në zonën e demilitarizuar thoshte se veprimi parandalues ushtarak ishte në tavolinë.
Mike Pence e viziton Korenë e Jugut për të konfirmuar lidhjet midis dy vendeve, ndërkohë që sot ka nisur një stërvitje e përbashkët ushtarake e forcave ajrore amerikane dhe koreanojugore. /tesheshi.com/
