Fluksi i azilkërkuesve në Gjermani ka shtuar presionin mbi politikën që të veprojë e të vendosë për masa për këtë situatë. Samiti i planifikuar për në vjeshtë në lidhje me azilkërkuesit është afruar për në datën 9 Shtator.
Njoftimi vjen nga zyra e kancelares Merkel ndërsa shtypi shkruan se vendimi është marrë për shkak të presionit të landeve për të marrë vendime të shpejta. Kryeministrat e disa landeve, sidomos atij bavarez Horst Seehofer thanë se nëse nis stina e ftohtë, refugjatët nuk mund të strehohen më nëpr cadra.
Në takimin e ri të nivelit të lartë, sipas DW, pritet të diskutohet ndër të tjera edhe për një zgjerimin e vendeve të sigurta të origjinës dhe përfshirjen në të të Kosovës, të Shqipërisë dhe të Malit të Zi. Vitin e kaluar u shpallën vende të sigurta Serbia, Bosnja-Hercegovina dhe Maqedonia. Ky klasifikim mundëson një procedurë të shkurtuar të azilit dhe një dëbim më të shpejtë në vendet e origjinës.
Sipas të dhënave të Entit Federal për Migracionin dhe Refugjatët përfshirja e Serbisë, Bosnje-Hercegovinës dhe Maqedonisë në listën e vendeve të sigurta të origjinës ka ndikuar në rënien e nivelit të azilkërkuesve nga këto vende.
Kështu, në gjysmën e parë të vitit 2015 nga Serbia, Bosnja dhe Maqedonia ka pasur vetëm një rritje prej 23 për qind të numrit të azilkërkuesve në Gjermani në krahasim me muajt e mëparshëm. Kursi numri i kërkesave për azil nga vendet e tjera të Ballkanit që nuk konsiderohen ende si të sigurta u rrit me 515 për qind. /tesheshi.com/
