Andrea Pirlo do ta lerë futbollin në muajin dhjetor, kur i skadon kontrata me Nju Jork Siti. Këtë e ka bërë të ditur vetë mesfushori italian, në një intervistë dhënë për mediat e vendit të tij. Pirlo është shprehur se duhet thënë “mjaft” me futbollin e luajtur, nëse fiziku nuk të lejon të stërvitesh si duhet, e kur fusha e lojës, të “ngacmon” në çdo lëvizje.
38-vjecari që ka fituar gjithçka në jetën e tij si futbollist, për më tepër edhe dashurinë e njerëzve brenda dhe jashtë Italisë, me xhentilesë deklaron se do të largohet, edhe për të mos i zënë vendin të rinjve që afrohen në skuadër.
Megjithatë, mesfushori fantazist italian nuk është duke e menduar aktualisht të fillojë të praktikojë trajningun. Ai shprehet se menjëherë pas muajit dhjetor kur të mbyllë kontratën në MLS, do të kthehet në Itali e do të qëndrojë me familjen e tij, për ta marrë së bashku vendimin e vazhdimësisë.
Pirlo thekson se për t’u bërë trajner, sic kanë bërë shumë shokë të brezit të tij, si Nesta, Kanavaro, Zambrota, Gatuso e Inzagi, kërkon “mendje të ndarë”, gadishmëri për këtë fazë të re të jetës, e sakrifica, gjëra që sipas tij, ende nuk i ndjen tek vetja.
Lidhur me pyetjet që e shohin “regjisorin” si zëvendës të Kontes, Pirlo e merr me të qeshur e nuk e konfirmon dicka të tillë, edhe pse për Konten, nuk i kursen lëvdatat, si lojtar e si trajner.
Mesfushori “i zgjuar” ka shprehur keqardhje për momentin që po kalon futbolli i vendit të tij, edhe pse ka besim se axurrët do të ngrihen në lartësinë e famës, pas 2 Botërorëve jo të mirë.
Pirlo pranon se i duhet dhënë më tepër besim të rinjve, por si kalimthi përmend edhe faktin se paratë e shtuara dhe kontratat personale të lojtarëve, kanë filluar të dominojnë karakterin e tyre, e mbi të gjitha, detyrimin për të dhënë “shpirtin” për Kombëtaren.
Andrea Pirlo do të mbahet mend si një ndër futbollistët më të famshëm italianë të pas-viteve 2000. Një organizator i shkëlqyer, goditës përfekt nga jashtë zone, elegant në lojë, simpatik nga ana njerëzore, ai u bë shpirti i dy ekipeve ku luajti, Milanit, Juventusit, Manchester Sitit si dhe gjithashtu i përfaqsueses italiane, me të cilën u shpall kampion bote në Botërorin 2006. Ishte një triumf që kishte portretin e tij! /tesheshi.com/
