Pothuajse 22 vjet pas futjes së euros, janë ende 12.2 miliardë marka gjermane në qarkullim, të cilat qytetarët nuk i kanë këmbyer me euron, njoftoi Banka Qendrore e Gjermanisë.
“Në fund të nëntorit, në qarkullim ishin ende 12,2 miliardë monedha dhe kartëmonedha të markës gjermane, pra 6,24 miliardë euro”, tha drejtori i Bankës Qendrore Gjermane, Burkhard Balz, në një intervistë për agjencinë dpa.
Ai tha se vetëm këtë vit janë këmbyer 53 milionë marka me euro.
“Ne llogarisim në faktin që edhe vitin e ardhshëm do të ketë një shkëmbim masiv të markave në euro, më habit fakti që edhe në dekadën e tretë pas futjes së euros, sa marka ende nuk kanë gjetur rrugën e tyre në Bankën Qendrore”, tha Balz.
Ai beson se një sasi e caktuar nuk do të këmbehet kurrë me euro sepse do të mbeten në koleksionet e numizmatistëve. Ka ende në qarkullim kartëmonedha me vlerë 5.7 miliardë marka dhe monedha me vlerë 6.6 miliardë marka.
Balz beson se një pjesë e madhe që ende nuk janë kthyer në Bankën Qendrore të Gjermanisë ndodhen jashtë vendit.
“Marka gjermane është ende monedha rezervë e preferuar në mbarë botën,” tha Balz.
Hulumtimet e mëparshme kanë treguar se shumë marka janë të vendosura në vendet prej nga vijnë shumica e punëtorëve të huaj në Gjermani, si Turqia dhe vendet e ish-Jugosllavisë.
Gjermania është një nga gjashtë vendet e Bashkimit Evropian ku nuk ka kufizim kohor për shkëmbimin e monedhës së vjetër me euron. /tesheshi.com/
