Faktori ndërkombëtar pret me padurim listat e deputetëve që partitë kryesore do të paraqesin të hënën. Kjo, për shkak të aspektit të ndjeshëm të kriminalizimit, për të cilin SHBA dhe BE kanë bërë apele të vazhdueshme. Kjo u theksua së fundi dhe nga ambasadori i BE-së në Tiranë Luigi Soreca.
“Ligji i dekriminalizimit duhet të zbatohet plotësisht, Pse? Sepse jemi në pikën e nisjes së negociatave dhe parlamenti i ri duhet t’u nënshtrohet reformave në fusha të tilla si lufta kundër krimit të organizuar, korrupsioni, dhe për ta bërë këtë duhet të keni standarde të larta integriteti të anëtarëve të parlamentit.
E hëna është afati për prezantimin e kandidaturave. Presim me padurim të shohim listën dhe ne sigurisht do të bëjmë vlerësimin tonë”, tha Soreca në një intervistë televizive.
Nga ana tjetër, Soreca apeloi që Reforma në Drejtësi të mos jetë pjesë e fushatës, në aspekt të diskutimit të saj.
“Shpresa ime sinqertë është që reforma në drejtësi nuk do të preket nga fushata zgjedhore.
Sepse për shqiptarët ajo nuk është një çështje ndarëse. 80% e shqiptarëve, sipas sondazhit të fundit të Delegacionit tonë, janë në favor të reformës në drejtësi.
Ndaj, është shumë e rëndësishme sipas mendimit tim që fokusi të mbetet te bërja më efikase e reformës në drejtësi, më përmbushëse”, tha kryediplomati i Brukselit në Tiranë. /tesheshi.com/
