Sekretari i përgjithshëm i Lëvizjes BESA, Afrim Gashi, në një postim në rrjetin social Facebook, ka thënë se më shumë do të preferonte të vdesë, se sa të bëhet bashkë me Ali Ahmetin. Ky postim i tij vjen pas deklaratës së përbashkët të partive politike shqiptare në Maqedoni, të cilën e ka mbështetur edhe Lëvizja BESA, pasi siç shprehen ata, bëhet fjalë për interesa kombëtare, por duke theksuar se nuk do të bëjnë koalicion me BDI-në e Ali Ahmetit. Ja edhe postimi i tij i plotë:
“Me qenë mes dilemës a të vdes apo të bëhem bashkë me BDI-në e Ali Ahmetit, pa asnjë mëdyshje kisha vendosur të vdes! Më mirë të vdes faqebardhë se i njollosur duke qenë në një vend me Ali Ahmetin”, ka shkruar në facebook, Afrim Gashi.
Ndryshe deklarata e përbashkët e partive politike shqiptare, si kusht për të koalicionuar me partitë maqedonase për formimin e qeverisë së re, është keqinterpretuar nga disa media duke dhënë pasqyrë të gabuar mbi situatën faktike, pasi që thuhej se Lëvizja BESA ka thyer besën e dhënë se asnjëherë nuk do të koalicionoj me BDI-në.
“Deklarata e përbashkët e partive shqiptare në Maqedoni nuk nënkupton se partitë kanë rënë në ujdi për t’u futur bashkë në qeveri. Deklarata nënkupton që partitë zotohen t’i mbështesin pikat që janë në interes të shqiptarëve pavarësisht nëse janë në pozitë ose në opozitë.
Kjo është e tëra, askush nuk është bashkuar me askënd!
Së paku jo Lëvizja BESA!”, ka shkruar Orhan Murtezani, zëdhënës i shtabit zgjedhor të Lëvizjes BESA. /tesheshi.com/
