Në një intervistë të dhënë për të përditshmen DITA në Shqipëri, një nga themeluesit dhe drejtuesit e lëvizjes BESA, Afrim Gashi, ka shpalosur vizionin e forcës së tij politike mbi zgjidhjen e çështjes së shqiptarëve në Maqedoni, duke lëshuar njëherësh disa receta dhe për politikën zyrtare të Tiranës.
Sipas Gashit, të dyja partitë politikë shqiptare në Maqedoni, ato që kanë qenë në aleancë me qeverisjet maqedonase të dy kahjeve, nuk kanë arritur të bëjnë asgjë deri më tani për gjendjen e shqiptarëve. Ai ka bërë me dije se prej vitit 2002, numri i shqiptarëve të shpërngulur nga Maqedonia ka shkuar në afro 400 mijë.
“Në Maqedoni ka kohë që po mbretëron një gjendje e pashpresë e shqiptarëve si në spektrin e të drejtave kombëtare shqiptare, po ashtu edhe në ato qytetare. Vazhdojnë proceset e montuara politike, ku shqiptarët dënohet me burgime të përjetshme pa pasur pikë faji, vazhdon diskriminimi i arsimit shqip, ndërsa për diskriminimin ekonomik as që ia vlen të flitet”, ka thënë Gashi për të përditshmen DITA.
Ndërkohë që ai ka kërkuar nga Tirana zyrtare më shumë vëmendje dhe më shumë angazhim në funksion të përmisimit të gjendjes së shqiptarëve edhe në trojet rretherrotull.
“Mendoj se Shqipëria mund të hartonte një projekt për çështjen shqiptare në Ballkan, në të cilin do të përcaktohej se si e sheh ajo të ardhmen e Kosovës, atë të shqiptarëve të Maqedonisë, të Malit të Zi etj. Ky projekt do të ishte në një mënyrë korniza e çështjes shqiptare në Ballkan, të cilin do të ishin të detyruar ta respektojnë të gjithë faktorët relevantë përkatës”, ka thënë Gashi.
Lëvizja BESA është një risi në skenën politike maqedonase, ku për shumë shqiptarë po shihet si një mundësi e re për t`ju qasur ndryshe dhe me një moral të ri zgjidhjes së statusit të cënuar të shqiptarëve në realitetin maqedonas. /tesheshi.com/
