Ashtu si disa shtete anëtare të Bashkimit Europian, edhe Italia ka strehuar mijëra refugjatë, të cilët kanë lënë vendet e tyre, për shkak të mungesës së stabilitetit ekonomik dhe politik, apo trazirave e luftërave.
Këtë vit, shteti italian ka ngritur kampe të shumta, duke sistemuar numrin më të lartë të emigrantëve që ka pritur ndonjëherë. Ministria e Brendshme tha se këtë vit kanë hyrë mbi 171,000 migrantë, krahasuar me rekordin e vitit 2014, prej 170,100 migratësh. Mbi 176,000 persona janë të strehuar aktualisht në qendrat e pranimit në disa qytete italiane.
Ndërkohë, rreth 4700 emigrantë kanë vdekur ose janë zhdukur në përpjekje për të kaluar detin Mesdhe, gjatë vitit 2016, thanë Kombet e Bashkuara.
Rritja e numrit të refugjatëve ka ardhur pasi rrugët përmes Greqisë dhe Ballkanit janë mbyllur, pas një marrëveshje midis Bashkimit Evropian dhe Turqisë në muajin mars.
Italia është një shtet që e ka dëshmuar shpirtin human që në vitin 1991, kur u përball me eksodin e 20 mijë shqiptarëve, mes tyre gra e fëmijë, të cilët zbarkuan në brigjet e Barit, përmes anijes “Vlora”. /tesheshi.com/
