Arabia Saudite nuk ka krijuar lidhje të drejtpërdrejta me Izraelin, por ka zgjedhur një mënyrë tjetër për të normalizuar marrëdhëniet me atë vend dhe për t’u hapur ndaj hebrenjve, duke përfshirë heqjen e përmbajtjes antisemitike nga librat shkollorë dhe thirrjen për tolerancë fetare në lutje, shkruan agjencia AFP.
Mbretëria e Arabisë Saudite nuk ndoqi shembullin e Emirateve të Bashkuara Arabe dhe Bahreinit, të cilët vendosën marrëdhënie zyrtare me Izraelin dhe kështu thyen “konsensusin arab” për normalizimin e marrëdhënieve me shtetin hebre, me kushtin që konflikti izraelito-palestinez të zgjidhet përfundimisht me krijimin e një shteti të ri të Palestinës me Jeruzalemin lindor si kryeqytet.
Sipas agjencisë, Arabia Saudite e kupton që opinioni i saj publik, i cili është akoma në favor të palestinezëve, nuk është i gatshëm për këtë lloj normalizimi të marrëdhënieve, por ajo ka vendosur të ndryshojë imazhin e përgjithshëm të hebrenjve që janë të satanizuar në mediat zyrtare dhe institucionet fetare, shkruan AFP.
Në shtator të vitit të kaluar, një imam shkaktoi një stuhi të vërtetë mediatike duke kujtuar marrëdhëniet miqësore të Profetit Muhamed me hebrenjtë.
Abdel Rahmane al-Soudaiss, imam i Xhamisë së Madhe në Mekë, ka provokuar polemikë të madhe në të kaluarën për pikëpamjet e tij anti-hebreje.
Nga ana tjetër, Mohammed al-Issa, një saudit në krye të Lidhjes Botërore Islame, vlerësohet në Izrael për pjesëmarrjen në përkujtimin e 75-vjetorit të çlirimit të kampit nazist Auschwitz.
Gjatë Ramazanit në qershor, kanali televiziv MBC transmetoi një shfaqje në të cilën një person mbrojti lidhjet tregtare me Izraelin dhe i cili i quajti palestinezët “armiq të vërtetë”, me pretendimin se ata nuk pushojnë së fyeri sauditët pavarësisht nga ndihma politike dhe financiare që marrin nga Riadi.
Pyetja nuk është “si” por “kur”
Por kur bëhet fjalë për vendosjen e marrëdhënieve zyrtare me Izraelin, pyetja nuk është “si” por “kur”, tha Marc Schneier, një rabin i SHBA pranë udhëheqësve të Gjirit.
Javën e kaluar, Arab News, e përditshmja kryesore saudite në anglisht, ndezi një diskutim të gjallë në mediat sociale pasi uroi në hebraisht Rosh Hashanah – Vitin e Ri Hebre – në Twitter dhe Facebook.
Gazeta gjithashtu njoftoi artikuj rreth hebrenjve në Liban dhe komunitetit hebre që jetonin në atë që është tani Arabia Saudite.
Por sipas një sondazhi të kryer në gusht nga Instituti për Politikën e Lindjes së Mesme në Uashington, shumica dërrmuese e sauditëve hezitojnë të arrijnë një marrëveshje me Izraelin.
“Vetëm 9 përqind e sauditëve mbështesin lidhjet tregtare dhe sportive me Izraelin,” tha David Pollock, një ekspert nga instituti i përmendur.
Giorgio Cafiero, drejtori i Institutit të Analizave të Shtetit të Gjirit, gjithashtu thekson se vendosja e marrëdhënieve zyrtare të Izraelit me qeveritë e pazgjedhura arabe “nuk është e njëjta gjë si vendosja e paqes me popujt arabë”. /tesheshi.com/
