Një burim opozitar sirian, ka deklaruar të shtunën se rebelët kanë thyer rrethimin e forcave qeveritare në qytetin e Halepos, pas një javë luftimesh të ashpra, njoftoi AFP.
Ata kanë zhvilluar luftime që prej 31 korrikut, me qëllim të dhënies fund një rrethimi tre-javor nga forcat qeveritare të pjesës jugore të qytetit të Halepos.
“Rebelët kanë shpërthyer rrethimin e Halepos”, ka shkruar Koalicioni Nacional, me seli në Stamboll në Twitter.
Fraksioni Ahrar al-Sham, po ashtu ka shkruar në Twitter se “rebelët kanë marrë nën kontroll skajin jug-perëndimor të qyetit, të quajtur Ramussa, duke hapur kështu rrugën për në Halepo”.
Por Al-Manar, kanal televiziv i grupit libanez të Hezbollahut, i cili ka pjesëtarë që janë rreshtuar prapa forcave qeveritare siriane, kanë mohuar se Ramussa ka rënë apo se rrethimi është thyer.
Ndërsa një gazetar i AFP-së në jug të qytetit, thotë se qytetarët të gëzuar kanë dalë jashtë, duke festuar me të shtëna në ajër.
Ish-Fronti Nusra , e riemëruar si Fronti al-Sham pas ndarjes nga Al-Qaeda, ka thënë të shtunën se rebelët që ndodhen brenda rrethimit janë lidhur me ata në periferi.
“Ne jemi duke punuar për marrjen nën kontroll të pikave të fundit të mbetura, në mënyrë që të thyejmë rrethimin”, thotë grupi.
Forcat qeveritare kanë rrethuar Halepon me 17 korrik, duke mbyllur korridorin e fundit për në qytet, të kontrolluar nga opozita.
Rreth 250,000 njerëz jetojnë në pjesët e Halepos të kontrolluar nga forcat rebele.
“Ditë më parë, unë isha vetëm duke menduar rreth asaj se si të gjej një kafshatë bukë për të ngrënë”, thotë Ahmad Adna, një qytetar 46-vjeçar i pjesës lindore të Halepos.
“Tani jam më optimist, pasi Armata e Fitores po avancon. Shpresoj që kjo të jetë dita e fundit e rrethimit”, tha ai para se opozita të njoftojë se është hequr rrethimi. /tesheshi.com/
