Ndërsa, është Vetëvendosje që njihet si lëvizje që organizon aksione të ndryshme kundër qeverisë dhe rivalëve politik, një gjë e tillë po i ndodh pikërisht VV-së.
Në rrugët e Prishtinës janë shpërndarë disa afishe në të cilat po bëhet krahasimi i zyrtarëve të VV-së me kriminelët serb.
Në një prej afisheve, sekretari organizativ i VV-së, Dardan Molliqaj, krahasohet me kriminelin serb, Zheleko Raznatoviq, i njohur si Arkan.
Veç kësaj, në afishe shihen edhe krahasimet që i janë bërë VV-së me grupin kriminel të Kolumbisë, “Medellin”, rrjet ky i organizuar i dilerëve të drogës që ka funksionuar në vitet e ’70-ta dhe të ’80-ta në Bolivi, Kolumbi, Honduras, Peru, në SHBA, Kanada e Evropë.
“Gjeni dallimet”, shkruan në njërën prej tyre derisa në fotografi janë paraqitur kryekrimineli Arkan dhe sekretari organizativ i Vetëvendosjes, Molliqaj.
Derisa në tjetrën shkruan se në krahasimi bëhet për të ngacmuar kujtesën për të kaluarën dhe të tashmen.
“Shkatërrimi i Kosovës është Misioni i tyre”, dhe “#VV VëllaVrasje”, janë disa nga fjalët me të cilat vazhdon kjo afishe.
“JO = Republikës së Kosovës, MSA-së, Demarkacionit, Flamurit Shtetëror, Kosovës në OKB, VV=Rrezik Kombëtar. PO = Shkatërrimit të Shtetit”, është një prej afisheve tjera që janë parë ditëve të fundit nëpër lagje të ndryshme të kryeqytetit.
Edhe pse këto afishe janë shpërndarë në rrugë të frekuentuara të kryeqytetit nde nuk dihet se kush janë autorët.
Zyrtarja për informim në Policinë e Kosovës, Flora Ahmeti, ka thënë për mediat se deri më tani nuk kanë pranuar asnjë ankesë nga palët e prekura.
Vetëvendosje: PDK-ja po paguan njerëz për afishet kundër nesh
Lëvizja Vetëvendosje ka reaguar ndaj shpërndarjes së disa afisheve, në të cilat ky subjekt politik krahasohet me kryekriminelin serb Arkan dhe me bandën famëkeqe “Medelin”.
VV thotë se në bazë të informacioneve brenda PDK-së, disa grupe të caktuara të kësaj partie, kanë paguar njerëz për të shpërndarë këto afishe.
“Është interesante se si ata që po negociojnë me Serbinë e Vuqiqit, pra me pasardhësit e Millosheviqit dhe me udhëheqësit e Arkanit, po e akuzojnë Lëvizjen Vetëvendosje për ngjashmëri me Arkanin. Ata që po ia japin Serbisë një republikë serbe brenda Kosovës, po bëjnë krahasime të tilla absurd.
Ne kemi informacione nga brenda PDK-së që grupe të caktuara në PDK, të lidhura me klanin pronto, po paguajnë njerëz për të shpërndarë këto afishe. Fakti që PDK nuk po ka guxim t’i realizoj këto aktivitete publikisht (ashtu siç i ka bërë Lëvizja Vetëvendosje gjithmonë aktivitetet e saj), flet për një frikë dhe panik të madhe. Pushteti po e sheh që fundin e ka shumë afër dhe prandaj gjithë kjo panik”, thuhet në deklaratën e VV-së.
/tesheshi.com/
