Sekretari amerikan i Shtetit, Mike Pompeo, që nga Athina ku ishte për një vizitë zyrtare, dënoi atë që e quajti “abuzim” me stafin e Departamentit të Shtetit nga një hetim parlamentar në Dhomën e Përfaqësuesve të Kongresit, gjë që mund të çojë në heqjen e Presidentit Donald Trump.
Kongresi, u tha Pompeo gazetarëve, “ngacmon” punonjësit e Departamentit të Shtetit duke kërkuar direkt prej tyre për dokumente të ministrisë.
“Është abuzim dhe nuk do ta lejoj”, shtoi ai.
Pompeo konfirmoi të mërkurën, ndërsa vizitoi Romën, se ai kishte marrë pjesë në një bisedë telefonike mes Trump dhe Presidentit të Ukrainës Volodymyr Zelensky më 25 korrik.
Thuhet se Trump i kërkoi homologut të tij ukranias që të hetojë rivalin e mundshëm kryesor në zgjedhjet e ardhshme presidenciale të SHBA, Joseph Biden, të Partisë Demokratike.
Demokratët në Kongres po përpiqen të dëshmojnë se Trump ka bërë presion ndaj Kievit për të denigruar ish-zv/presidentin Biden, i cili konsiderohet kundërshtari më i mirë i Trumpit në zgjedhjet presidenciale të nëntorit 2020.
Si pjesë e hetimit për veprimet e Trump, demokratët filluan të dëgjojnë përfaqësuesit e Departamentit të Shtetit dhe i kërkuan Pompeos që të sigurojë dokumentet kryesore të bisedës mes Trump dhe Zelensky-t. /tesheshi.com/
