Adem Grabovci nga sot nuk është më shefi i grupit parlamentar të Partisë Demokratike të Kosovës (PDK).
I njohur si “shefi i shefave” në opinionin publik kosovar ka dhënë sot dorëheqje pas aferës së përgjimeve “Pronto 2”, ku ai është njeriu kryesor që ndërmjetëson për punësime e rehatime të të afërmve të familjarëve të bashkëpartiakëve të tij, por edhe të militantëve të tjerë partiakë.
Grabovci, përmes një letre dërguar mediave, thotë se dorëhiqet për t’i hapur rrugë trajtimit adekuat ligjor të rastit në fjalë.
Në letrën e Grabovcit dërguar mediave thuhet:
“Ditëve të fundit janë publikuar biseda në media të cilat kanë pasur për objekt emrin dhe autoritetin tim politik e njerëzor. Me siguri këto kanë krijuar një ambient jo të këndshëm për opinionin publik, institucionet e vendit, PDK-në, por edhe për mua dhe familjen time.
Me qëllim të reagimit tim moral dhe politik ndaj një çështje të tillë dhe hapjes së mundësisë së trajtimit adekuat ligjor të këtij rasti, i cili ka prekur edhe privatësinë, por edhe autoritetin e subjektit politik dhe timin personal, ofroj dorëheqje nga kryetari i grupit parlamentar të PDK-së.
Unë jam përpjekur vazhdimisht që angazhimi im të jetë çdo herë në kuadër të ligjeve dhe normave demokratike, dhe për të mirën e vendit dhe qytetarëve tanë. Vazhdoj të besoj se të gjithë duhet të angazhohemi për një shtet demokratik ku respektohet ligji, por edhe liritë individuale të secilit prej nesh. Do të vazhdoj të mbroj të drejtat e mia, por edhe të secilit qytetar kur ato cenohen, si dhe të respektoj institucionet dhe shtetin tonë.
Gjatë jetës sime dhe aktivitetit politik jam atakuar shpesh, dhe pasojat nuk janë bartur vetëm nga unë, por edhe nga grupimi politik dhe nga familja ime, që çdo herë ishin afër meje sikur edhe në rastin në fjalë. E di se në momente të caktuara edhe jam sfiduar, por edhe i kam tejkaluar ato, në një mënyrë tjetër edhe tash po sfidohem.
Falënderoj të gjithë ata me të cilët kam bashkëpunuar si kryetar i GP-së, si dhe PDK-në për besimin e dhënë.” /tesheshi.com/
