Afera e korrupsionit të kompanisë çeke CEZ është përhapur në Europë, duke goditur edhe vendin që ka presidencën e Bashkimit Europian.
Pas Shqipërisë dhe Çekisë, edhe në Bullgari ka shpërthyer një aferë korrupsioni që ka tronditur qeverinë e vendit ballkanik.
Siç bën të ditur Radio Sofja, ministrja bullgare e Energjetikës, Temenuzhka Petkova ka dhënë dorëheqjen pas një bisede me kryeministrin Bojko Borisov.
Largimi i Petkovës erdhi pas shpërthimit të një skandali mbi shitjen e kompanisë së shpërndarjes së energjisë tek kompania çeke CEZ.
Ajo akuzohet se është kumbare e shefes së firmës e cila bleu konsorciumin.
Liderja e Partisë Socialiste Bullgare, Kornelija Ninova akuzoi qeverinë se firma blerëse e kompanisë së shpërndarjes u regjistrua në shtator të vitit 2017 me kapital nga 25 mijë euro dhe vetëm disa muaj më vonë i ka paguar CEZ-it 320 milion euro, për një biznes i cili realizon qarkullim për 750 milion euro për vit.
Sipas lideres së socialistëve, përgjegjësinë për këtë kontratë mban personalisht kryeministri Bojko Borisov.
Kryeministri bullgar, pas shpërthimit të skandalit ka caktuar Agjencinë Shtetërore për Sigurinë Kombëtare dhe Agjencinë Kombëtare të Ardhurave (NRA) për të kryer një kontroll të plotë në shitjen e kompanisë CEZ.
Ajo menaxhon shpërndarjen e energjisë elektrike të Bullgarisë dhe për blerësin Inercom Bullgaria EAD.
“Ju kujtojmë se Qeveria nuk është e përfshirë në transaksionin midis dy kompanive private, por do të përdorë burimet e saj për të parë të gjitha rrethanat dhe për të garantuar sigurinë e energjisë”, thuhet në njoftimin për shtyp të zyrës së kryeministrit.
Inercom Bullgaria, me seli në qytetin jugor të Pazardikut, bleu paketën e shtatë kompanive të CEZ për 320 milionë euro.
Presidentja e kompanisë, Vurbakova ka mohuar spekulimet se Inercom është e implikuar në interesa spekulative.
“Ne do të mbështetemi vetëm nga një institucion bankar i respektuar, i cili do të na japë kredi në bazë të kritereve specifike që lidhen me biznesin tonë dhe kushteve të kreditit”, tha pronarja e Inercom.
“Ne do të punojmë që të bëjmë ofertën më të mirë për klientët, ne planifikojmë të zbatojmë teknologji inovative në bazë të praktikave të vendosura ndërkombëtare, do të kanalizojmë investime në projekte që optimizojnë kostot operacionale”, tha Vurbakova.
Siç mësohet, në hetimin e aferës është aktivizuar edhe Komisioni Europian, i cili ka dërguar në Sofje një grup auditi për të parë nëse janë shkelur të drejtat e konsumatorëve dhe nëse ka pasur opozita monopol.
Bashkimi Europian ka marrë të rrepta anti-trust dhe shpesh ka gjobitur korporatat e mëdha.
Duket se shpërthimi i valës së hetimeve për aferat e CEZ-it në Ballkan nuk janë rastësi, por një zhvillim që duket komandohet dhe drejtohet nga Brukseli.
Edhe në Shqipëri, Prokuroria e Tiranës ka nisur një hetim për aferën e shitjes së Operatorit të Shpërndarjes së Energjisë ndaj CEZ në vitin 2009, si dhe transaksionet që kanë shoqëriar këtë operacion, deri në largimin e korporatës çeke në vitin 2013.
Prokuroria e Tiranës ka thirrur për të dëshmuar edhe Shëlzen Berishën, djalin e ish-kryeministrit Sali Berisha. /tesheshi.com/
