Pas grabitjes së ndodhur më 30 qershor në aeroportin “Nënë Tereza”, ka ardhur reagimi i “Tirana International Aeroport”. Në një deklaratë për shtyp, TIA fajëson Policinë e Shtetit për ngjarjen e ndodhur, duke bërë me dije se vetë punonjësit e policisë ishin në pistë, disa metra larg vendit ku ndodhi grabitja.
“TIA ka ndjekur me shqetësim raportimin e Policisë së Shtetit. TIA ka njoftuar në kohë policinë, kur makina bashkë me autorët e krimit ishte ende në vendngjarje. Janë dorëzuar të gjitha dokumentet që dëshmojnë këtë. Punonjësit e policisë kanë qenë prezent në pistë pak metra nga ku ka ndodhur grabitja”, – tha në emër të TIA-s drejtoresha e komunikimit për median, Arlinda Çausholi.
Në respekt të hetimeve, të imazhit të Shqipërisë dhe personave që janë nën hetim, Çausholli bëri thirrje për trajtimin e kujdesshëm të informacionut që jepen për publikim. Ajo shtoi se dokumentet dërguar autoritetit të aviacionit civil janë vënë në dispozicion të organeve kompetente që po hetojnë ngjarjen
Nga ana tjetër ajo u shpreh se kompania ICTS që operon në aeroport nuk vepron e armatosur.
“Kompania ICTS është përgjegjëse vetëm për sigurinë aeroportuale, çka nuk e zëvendëson detyrën e Policisë të Shtetit. ICTS nuk ka asnjë të drejtë të ndërhyjë fizikisht, pasi vepron e paarmatosur. Vetëm Policia e Shtetit është i vetmi institucion që mund të hyjë i armatosur në aeroport. Për hyrjen e makinës jashtë gardhit të aeroportit, fajin e ka policia, e cila duhet të ruajë sigurinë e aeroportit”, – tha Çausholli.
Në emër të TIA-s ajo u shpreh se siguria kombëtare është përgjegjësi e përbashkët e të gjitha autoriteteve që kanë përgjegjësi në aeroport dhe janë prezente në aeroport. “Aeroporti është i të gjithëve. Nuk është në mendësinë e TIA-s të bëjë gara me deklarata. Jemi të detyruar të flasim tani duke vënë re se po cenohet një kompani që është në shërbim të qytetarëve, biznesit dhe shtetit shqiptar. Shqetësimi është i madh. TIA është pranë punonjësve të saj dhe sidomos pranë zotit Vangjel Nikolla, drejtues i shërbimeve aeroportuale të TIA-s”, – tha ndër të tjera Çausholli. /tesheshi.com/
