I mbyllur që nga 22 marsi, kur edhe ndodhën shpërthimet në të, aeroporti i Brukselit po përgatitet të rinisë funksionimin, edhe pse ai do të jetë i kufizuar.
Në një njoftim të operatorëve të aeroportit lajmërohet se ai është gati për të rinisur fluturimet e pasagjerëve, ndërsa është bërë gati infrastruktura e përkohshme për regjistrimet.
Megjithatë, ende pritet një vendim zyrtar për rinisjen e punës. Ndërkaq, është pohuar se gjer në mbrëmjen e ditës së sotme nuk do të ketë fluturime pasagjerësh.
Edhe pse fluturimet do të rinisin, zona e nisjes do të jetë në gjendje të funksionojë vetëm në 20 për qind të kapacitetit të vet normal. Çka do të thotë se sistemi i përkohshëm mund të pranojë vetëm 800 pasagjerë në orë në nisje, një numër shumë më i vogël se ai normali.
Ambientet e mbërritjes, në të kundërt, kanë qenë pak të dëmtuara, e janë bërë gati prej kohësh për t’u vënë në funksion.
“Hapi përfundimtar për rinisjen është miratimi zyrtar politik. Ndërkohë, është vendosur që nuk do të ketë fluturime pasagjerësh gjer mbrëmjen e së premtes,” thuhet në njoftimin e autoriteteve të aeroportit.
Rihapja e plotë e aeroportit do të kërkojë muaj të tërë. /tesheshi.com/
