Një adoleshente gjermane që u largua nga shtëpia e saj për t’u bashkuar me forcat e ISIS-it dhe tani po përballet me dënimin me vdekje në një burg të Irakut, është ribashkuar me nënën dhe motrën e saj për herë të parë në më shumë se një vit.
Shtatëmbëdhjetëvjeçarja Linda Wenzel u zhduk nga shtëpia e saj në Pulsnitz, Saksoni vitin e kaluar. Ajo u gjet dhe u ndalua në Mosul me tre gra të tjera kur forcat irakiane e çliruan qytetin në korrik.
Momenti kur u nxor nga rrënojat u kap në kamerat, dhe u përhap shpejt në mediat sociale.
Wenzel u largua për herë të parë në Turqi, pastaj në Siri dhe Irak, ku u martua me një luftëtar çeçen të ISIS-it i cili vdiq përfundimisht në betejë.
Ndërsa po pret të gjykohet në Bagdad, Wenzel u vizitua nga nëna dhe motra e saj. Ajo u tha mediave gjermane se ishte penduar për vendimin për të ikur.
“Nuk e di prej nga më erdhi kjo ide idiote për t’u bashkuar me ISIS-in. E gjithë kjo ide ma shkatërroi jetën time”, tha ajo, duke mbajtur në dorë një lodër të sjellë nga nëna e saj.
Aktualisht nuk ka marrëveshje ekstradimi midis Gjermanisë dhe Irakut. Sipas mediave gjermane, të paktën gjashtë femra të tjera gjermane, disa me fëmijët e tyre, janë gjithashtu duke pritur për gjyq në Irak, me dyshimin se kanë luftuar për ISIS-in. /tesheshi.com/
