Qeveria amerikane e Donald Trump iu është përgjigjur gjithë atyre zërave në politikën e Tiranës që kanë deklaruar, ose dhënë të nënkuptuar, se Donald Lu, pra ambasadori i SHBA në Shqipëri, po ndjek një axhendë tjetër ndryshe nga ajo e Uashingtonit zyrtar.
Zëdhënësi i Departamentit Amerikan të Shtetit, Mark Toner,deklaroi për Zërin e Amerikës në gjuhën shqipe se Donald Lu është mëkëmbësi zyrtar i Presidentit, pra i kreut të ri të Shtëpisë së Bardhë Donjald Trump.
“Ambasadori Lu dhe ekipi i tij kanë punuar në partneritet me autoritetet shqiptare dhe me shoqërinë civile për të realizuar politikat dhe synimet e Shteteve të Bashuara. Departamenti i Shtetit ka besim të plotë tek ambasada dhe ambasadori në Tiranë”, u shpreh zëdhënësi i DASH.
Toner shtoi se veprimet e ndërmara nga Lu për pezullimin e vizave janë pjesë e veprimit të DASH pas prezantimit të shefit të ri Rex Tillerstone.
“Politika e Shteteve të Bashkuara në Shqipëri është të mbështesë anëtarësimin e vendit në Bashkimin Evropian dhe kryerjen e reformave të nevojshme për arritjen e këtij synimi. Kjo përfshin reformën në drejtësi, luftën kundër korrupsionit dhe krimit të organizuar si dhe luftën kundër ekstremizmit të dhunshëm”, tha Toner.
Ai shkoi më tej kur iu drejtua atyre që sulmuan Donald Lu-në:
“Shtetet e Bashkuara i bëjnë thirrje me forcë gjithë partive të respektojnë shtetin ligjor dhe procesin demokratik. Shtetet e Bashkuara duan të shohin një Shqipëri të fortë dhe të integruar plotësisht në familjen Euro-Atlantike”, deklaroi zëdhënësi i Departamentit të Shtetit Mark Toner. /tesheshi.com/
