Ministrat teknikë të propozuar nga PD-ja kanë nisur ndëshkimet për punonjës të administratës publike që përfshihet në fushatë. Ata kanë dhënë urdhër administratës që të mos marrë pjesë në takime elektorale.
Por a është ligjore të ndalosh angazhimin politik të qytetarëve?!
Kryeministri Rama ka sqaruar se çdo qytetar është i lirë të bëhet pjesë e zgjedhjeve pas orarit të punës.
“Njerëzit që punojnë në shtet qoftë edhe njerëz civilë, pas orarit të punës kanë të drejtë të bëjnë atë që duan si qytetarë për zgjedhjet. Mësuesit dhe drejtorët kanë të drejtë që pas orarit të mësimit të shkojnë në fushatë, nuk mund ta kthejmë këtë histori tani dolën fotot filani me këtë apo atë. Nuk po them në orar pune, por pas pune kanë të drejtë të bëjnë çfarë të duan. Kush shfrytëzon zyrën për fushatë, normale që do të shkojë në burg”, tha Rama.
Ndërkohë Ministria e Financave i ka kërkuar Prokurorisë procedimin penal për një inspektor të hetimit tatimor sepse ka marrë pjesë në aktivitetet partiake.
Nisur nga ky rast, kjo ministri u ka kërkuar të gjithë punonjësve të institucioneve të varësisë që të mos bëhen pjesë e fushatave dhe ka vënë në dispozicion një numër telefoni, ku çdo qytetar të mund të denoncojë rastet e përfshirjes së administratës në aktivitetet partiake.
Ministria e Arsimit po verifikon rastet kur drejtorë shkollash apo mësues janë përfshirë në fushatë. /tesheshi.com/
