Kryeministri Edi Rama pas zgjedhjeve parlamentare të 25 qershorit është shprehur se Shqipëria ka administratën më të vogël në rajon, por numrin më të lartë të drejtorëve.
Referuar kësaj, Rama premtoi një reformism të administratës duke bashkuar disa institucione, përfshi këtu edhe Ministri dhe duke shkrirë disa agjensi, të cilat sipas një raporti të hartuar nga grupi i punës që drejtohej nga ish-zv.kryeministri Niko Peleshi, sot ministër i Bujqësisë, kishin më pak se 10 punonjës.
Por si janë të shpërndarë mijëra punonjës të administratës në dikasteret kryesore?
Numrin më të madh të punonjësve e ka Ministria e Arsimit me mbi 30 mijë, e ndjekur nga ajo e Brendshme me mbi 14 mijë dhe e Mbrojtjes me mbi 8800. Pra në total vetëm këto 3 ministri kanë mbi 50 mijë punonjës nën varësinë e tyre.
Më pas vijnë 3 ministri të tjera, ajo e Shëndetësisë, e Drejtësisë dhe Mirëqënies Sociale, të cilat në total numërojmë mbi 11 mijë punonjës.
Referuar shifrave ajo që bie në sy është se Kryeministria ka mbi 600 të punës, ndërkohë Kuvendi megjithë deputetët ka rreth 400.
Ndër institucionet e larta të vendit, Presidenca ka numrin më të vogël të punonjësve me vetëm 76. /tesheshi.com/
