Adidas, një humbje vjetore për herë të parë që nga viti 1992

Prodhuesi gjerman i këpucëve dhe veshjeve sportive Adidas njoftoi të mërkurën rezultatet e vitit të kaluar, të cilat treguan se kompania shënoi humbjen e saj të parë vjetore që nga viti 1992.

Humbja neto e Adidas për vitin 2023 është 14 milionë euro, ndërsa humbja nga vazhdimi i operimit është 58 milionë euro, sipas raportit financiar të kompanisë.

Firma gjermane u detyrua t’i jepte fund bashkëpunimit me reperin Ye (Kanye West) për prodhimin e atleteve Yeezy pasi artisti kontrovers bëri një sërë deklaratash antisemite, raporton CNBC.

Përfundimi i partneritetit

Sipas Adidas, ndërprerja e këtij partneriteti çoi në një humbje prej rreth 500 milionë euro të ardhura të mundshme.

Kompania, pavarësisht humbjes së madhe nga atletet Yeezy dhe një strategjie shumë konservatore të shitjes, arriti në të ardhura të vazhdueshme, tha CEO i Adidas, Bjorn Gulden, duke shtuar se kompania realizoi një fitim operativ prej 268 milionë euro në 2023.

Adidas pret të shesë atletet e mbetura Yeezy këtë vit dhe të kthehet në fitim, ndërsa në të njëjtën kohë parashikon një fitim operativ prej 500 milionë euro deri në fund të 2024. /tesheshi.com/