Nga Blendi Gashi
Deputeti i LDK-së, Adem Salihaj, ka lënë gojë hapur të gjitha mediat por dhe mbarë opinionin publik në vend.
Arsyeja është thirrja e një konference për media në stilin e Nazim Bllacës, pra mbajtja e saj në shesh, konkretisht në sheshin “Ibrahim Rugova” në Prishtinë.
Njoftimi i Salihajt, i bërë mbrëmë se do t’i drejtohet mediave, ngjalli kurreshtje të madhe në mbarë opinionin publik.
Si mediat dhe jo vetëm, meduan, se Adem Salihaj ashtu si Nazim Bllaca vite më parë, po nga sheshi do të flas për vrasjet e pandriçuara të pasluftës, ku pritej që deputeti i LDK-së të jepte ndonjë informatë të pathënë më parë, kur dihet edhe vet ka qenë cak i atentatit, por që fatmirësisht i shpëtoi.
Pak orë para se ta mbante konferencën, Salihaj premtoi befasi, dhe vërtetë ashtu doli.
Kur të gjitha mediat vendore u mblodhën në shesh dhe pritnin një lajm ekskluziv lidhur me vrasjet e pandriçuara të pasluftës, deputeti i LDK-së habiti të gjithë me deklarimin e bërë duke folur për një çështje që askush as në ëndërr nuk mund ta ketë parë.
Pra, Salihaj, në konferencë nuk foli asgjë për atentatit që ju bë atij pas lufte, as për atentatin e bërë ndaj ish presidentit Ibrahim Rugova (temë kjo e aktualizuar ditëve të fundit), poashtu nuk foli as për vrasjet e ndonjë për bashkëpartiakëve të tij, si Xhemajl Mustafa, Smajl Hajdaraj, Tahir Zemaj etj.
Poashtu nuk foli as për problemet e shumta me të cilat përballet vendi, qoftë politike apo ekonomike, por krejt diç tjetër, që mund të mos i interesoj askujt.
Por, Salihaj, çuditërisht habiti të gjithë në konferencën që u mbajt në ora 11:00 kur filloi të flasë për një popull të quajtur Galash, të cilët tha se jetojnë në mes të Afganistanit dhe Pakistanit, e që paskan prejardhje Ilire, ku sipas Salihajt kanë mbetur atje prej ushtrisë së Aleksandrit të Madh.
“Ky popull ka përdorim të fjalëve shqipe, pra flasin gjuhën ilire e në kohët e fundit kanë dalë në pah disa fjalë të reja e që do të kenë ndikim në aspektin historik të zhvillimit të shqiptarëve që nga Ilirët e deri më sot. Ky popull që u vranë në hapësirat e larta të Afganistanit dhe Pakistanit ku u vranë në një betejë në Indi në 10 km larg dhe nuk u kthyen asnjëherë e që u martuan me gra vendase. Ata janë me rreth 6 mijë ushtarë dhe kanë një popull që ka shumë banorë.
Ky popull përdorin shumë fjalë shqipe, tradita të njëjta me ne dhe përdorin fjalë shqipe me emërtime, veshje dhe aspekte të tjera të njëjta. Ata jetojnë në tre vendbanime që quhen Bamira, Balta dhe Humza janë fjalë që shihet qartë që janë shqipe. Në Bamira është një panoramë fantastike, Balta një liqe fantastik. Malet që janë rreth tyre janë Ushtarët e Aleksandrit të Madh dhe vetë Aleksandri ishin ‘Iilir’ dhe instrumentet muzikore që përdorin sot janë krejt të njëjta me tonat. Ata janë ilir dhe ne jemi pasardhësit e tyre dhe është një tok-fjalësh që në përdorim edhe sot. Të rinjtë në këtë vend në ditën e dasmës së tyre betohen në gjuhën shqipe duke thënë “Derisa të vdes, besa-besë”, tha Salihaj, në fjalimin e tij befasues.
Me të thënë fjalët e para, Salihaj la të shtangur gazetarët e pranishëm dhe jo vetëm, të cilët pasi përfundoi konferenca i thonin njëri-tjetrit, se “asgjë nuk tha, nuk e kuptuam asgjë. Nuk paska thirrë konferencë për vrasjet e pasluftës siç është menduar”.
Vërtetë duke pritur se Salihaj do fliste për vrasjet e pandriçuara pasi është deputeti më i zëshëm për këtë temë, ai befasoi për të keq, duke e marrë rolin e historianit, ku padyshim se më së shumti mund të ketë zhgënjyer jo pak përkrahës të tij dhe partisë së tij LDK-së, por edhe familjarët e zyrtarëve të lartë të LDK-së që u vranë paslufte të cilët mund të kenë pritur që Salihaj mund të thotë diç të re në lidhje me zbardhjen e vrasjeve të familjarëve të tij.
Se pritej që Salihaj do thoshte diç të pathënë për vrasjet enigmatike të pasluftës, është thirrja e konferencës në një nga sheshet e Prishtinës.
Por, Salihaj me konferencën e tij zhgënjeu shumë, e më së shumti përkrahësit e partisë së tij, pasi për një temë të tillë nuk është dashur të flas në shesh të Prishtinës dhe nuk ka pasur arsye të kopjoj Nazim Bllacën, por ka mundur ta mbaj konferencën në ndonjë nga zyret e Kuvendit për temën që foli.
Andaj, Salihaj me “zbulimet” e tij, nga sot e tutje do të njihet edhe si një historian dhe sigurisht kjo konferencë e tij do të mbetet gjatë në kujtesën e mediave, pasi ato vërtetë ndoqën një “konferencë ekskluzive”.
Ndryshe, ditët e fundit, presidenti i vendit, Hashim Thaçi, ka nxitur debat në opinionin publik pas dërgimit të katër letrave në Prokurorinë Speciale të Kosovës, ku kërkon hetimin e vrasjeve të gjatë dhe pas luftës, kur për këto të fundit është pritur se Salihaj do të flas sot në konferencë, por që çuditërisht nuk ndodhi ashtu. /tesheshi.com/
