“Adem Jashari” në zemër të Prishtinës nuk i ka letrat në rregull. Bëhet fjalë për ish-sheshin Bashkim-Vëllazërimi që do mbajë emrin e heroit legjendar, punimet e së cilit do të pezullohen. Kjo për shkak se projekti nuk ka marrë pëlqim nga Instituti i Kosovës për Mbrojtje të Monumenteve.
Siç informojnë mediat e Prishtinës, të shtunën, kryeinspektori i Trashëgimisë Kulturore, Berat Hadri, bashkë me inspektoren Gjejlane Hoxha, kanë shkuar në vend-punime dhe kanë urdhëruar pezullimin e punës.
Projekti ka qenë dashur të miratohej nga IKMM-ja, për shkak që hapësira ku kishin nisur punimet është udhëkryq midis tri monumenteve, kanë argumentuar ata.
Punimet do të vazhdojnë të mbeten të pezulluara derisa komisioni i Institutit të Kosovës për Mbrojtje të Monumenteve ta shqyrtojë projektin dhe të marrë një vendim.
Rrënojat e Hamamit të vogël në oborrin e Kuvendit të Kosovës, Shtëpia gati njëshekullore me pronar Gazmend Abrashin, si dhe Xhamia e Çarshisë bëjnë që sheshi “Adem Jashari” të jetë brenda perimetrit të mbrojtur si shkak i monumenteve të sipërpërmendura. Ndërsa përmendorja që ka formë trekëndëshi nuk është nën mbrojtje si aset i trashëgimisë kulturore. /tesheshi.com/
