Partitë në pushtet në Kosovë vazhdojnë të qëndrojnë para deklarimeve të tyre të njohura se zgjedhje nuk do të ketë as këtë vit, as vitin e ardhshëm, duke thënë se ato do të mbahen në kohën e paraparë në vitin 2018.
Një deklarim të tillë së fundmi e ka bërë edhe një ndër njerëzit më të fuqishëm në partinë e Kadri Veselit, shefi i Grupit Parlamentar të Partisë Demokratike të Kosovës (PDK), Adem Grabovci. Ai në një intervistë dhënë për gazetën “Zëri” në Kosovë ka pohuar se PDK-ja nuk i frikësohet zgjedhjeve, megjithatë, sipas tij, zgjedhjet nuk mund të mbahen sa herë që kërkojnë subjektet opozitare.
“Ne nuk i jemi frikësuar dhe nuk i frikësohemi daljes para qytetarëve, jemi të gatshëm në çdo kohë që të komunikojmë me qytetarët tanë, t’i dëgjojmë shqetësimet që i kanë ata. Ne jemi deklaruar prej kohësh se nuk mund të ketë zgjedhje para vitit 2018 sepse nuk është interes i qytetarëve, i shtetit të Kosovës dhe i institucioneve të vendit. Zgjedhjet nuk mund të mbahen kur dikujt i teket. Është e sigurt se edhe po të mbaheshin zgjedhjet, opozita menjëherë do të kërkonte zgjedhje të tjera”, ka shtuar Grabovci, duke thënë se kjo parti gjithmonë vendimet i merr në bazë të interesave të qytetarëve dhe të shtetit.
Grabovci ndërkaq, u ka bërë thirrje deputetëve të subjekteve opozitare në vend që t’i kthehen punës së tyre në Kuvend dhe në këtë formë t’i kryejnë obligimet që kanë marrë nga qytetarët. /tesheshi.com/
