Kryeministri Kurti ishte në Shkup për ceremoninë e emërtimit të një rruge me emrin “Adem Demaçi”, ish-mentor i tij politik. Rruga me emrin e figurës historike të Kosovës, prej viteve të gjata në burgjet serbe apo jugosllave, u zgjodh në Komunën e Çairit, e njohur si për dominancën aty të popullsisë shqiptare.
Me emërtimin e kësaj rruge, sipas Kurtit, po shënjohet një triumf i lirisë në kuptimet e saj më të kulluara politike, historike dhe njerëzore.
“Adem Demaçi frikësoi dy liderët diktatorë, Josip Broz-Titon e ish-Jugosllavisë dhe Nikita Hrushovin e ish-Bashkimit Sovjetik, të cilët ishin kujdesur që para vizitës së tyre në Shkup, 60 vite më parë, ta burgosnin Adem Demaçin.
Shtypësit dhe mohuesit e lirisë, nuk mund të parakalonin lirshëm në një vend ku liria kishte për sinonim edhe një emër të përveçëm njeriu, emrin e Adem Demaçit.
60 vite më pas, në Maqedoni ka ende rrugë dhe shkolla me emrin ‘Josip Broz – Tito’, andaj emërtimi i një rruge me emrin ‘Adem Demaçi’ është edhe një akt këmbënguljeje në përpjekjen e pafundme të një populli për liri”, ka thënë Kurti. /tesheshi.com/
