Beogradi dhe Uashingtoni jo vetëm që nuk i kanë zbutur marrëdhëniet që prej acarimit të javës së shkuar, por zyrtarët serbë po i hedhin edhe më shumë benzinë zjarrit për rastin e vdekjes së dy diplomatëve serbë në Libi.
Pentagoni nuk ka marrë sërish përsipër vdekjen e tyre nga bombardimi që është kryer në Libi javën e shkuar kundër një kampi stërvitjeje të ISIS-it.
Ndërsa mediat serbe, prej ditësh akuzojnë SHBA se ka bombarduar edhe mbi dy diplomatë serbë që janë marrë peng nga ISIS.
Por Departamenti Amerikan i Mbrojtjes ka kundërshtuar hapur tezën se gjatë bombardimit janë vrarë civilë.
“Edhe sot pas disa ditëve, ne mund të themi se nuk ka pasur civilë në kampin që kemi sulmuar”, tha zëdhënësi i Pentagonit, Geoff Davis.
Ai shtoi se SHBA nuk mund të konfirmojë se diplomatët serbë janë vrarë në këtë sulm.
Sipas Davis, sulmi ajror kishte si objektiv një kamp stërvitjeje të ISIS-it ku janë përgatitur edhe pjesëtarët e komandove që kryen sulmin terrorist në Tunizi.
AFP informoi gjithashtu se në mesin e viktimave të sulmit në Sabra ishte edhe një nga drejtuesit e ISIS-it, Noureddine Cucana. Zyrtarët thonë se ai ndihmoi në përgatitjen e dy sulmeve të vitit të kaluar në Tunizi.
Por një zyrtar i Ministrisë së Jashtme serbe i ka cilësuar si të paqarta deklaratat e Uashingtonit.
Sekretari i Përgjithshëm i MPJ-së në Beograd, Veljko Odaloviç, tha se familjet e viktimave dhe shteti kërkojnë një përgjigje konkrete mbi bombardimin dhe vdekjen e dy zyrtarëve serbë, një shofer dhe një diplomate.
Odaloviç ka thënë se qëndrimi i Pentagonit nuk hedh dritë mbi ngjarjen. Ndërkaq, kryeministri Vuçiç ka zhvilluar një bisedë telefonike me Sekretarin e Shtetit, John Kerry, ku
sipas mediave serbe, ky i fundit i ka shprehur ngushëllimet për humbjen e jetës së diplomatëve, duke i thënë më pas se Departamenti i Shtetit do të furnizojë Serbinë me të gjitha të dhënat e hetimeve mbi bombardimin e së premtes. Përgatiti: Ylli Pata – /tesheshi.com/
