Lajmi i dhënë nga kryeministri Rama për sigurimin e gjysmë milioni dozave vaksina nag Pfizer / BioNtech për Shqipërinë, është për shkak që dhe dita e parë e 2021-shit të ketë atë vrazhdësi të gjuhës politike si zakonisht, në çdo kohë të vitit.
Kjo pasi kreu i opozitës “nuk e ka pritur mirë”. Një reagim nga Basha, gjithesi nuk sqaron nëse është fjala për gënjeshtër a diç tjetër në atë çfarë njoftoi Rama.
“Si përherë Rama përpiqet t’i shesë dështimet si suksese. Shqipëria është vendi që jep ndihmën më të vogël ekonomike për qytetarët e saj.
Rama premton të sjellë shumë pak vaksina, dhe shumë vonë krahasuar me vendet e tjera.
Serbia dhe Maqedonia e Veriut kanë nisur ndërkohë vaksinimin, ndërsa Rama shkoi në Nju Jork për të blerë këpucë të reja! Ky i dështuar duhet të largohet nga qeverisja, që Shqipëria të ndryshojë e të shpresojë sërish”, shkroi i pari i opozitës.
Iu përgjigj atij jo Rama por zëdhënësi i tij, shefi i kabinetit Endri Fuga, duke i kujtuar se në Maqedoninë Veriore nuk ka nisur asnjë fushatë vaksinimi.
“Zoti Lulzim kur ti fle Edi Rama vazhdon punon, kurse ti edhe kur punon fle! Maqedonia e Veriut, Mali Zi, Kosova s’kanë siguruar ende asgjë, ndërsa Serbia e nisi me vetëm 5 mijë doza! Fli zoti Lulzim dhe mos bëj politikë me shëndetin e me vaksinën në gjumë! #ShqipëriaBuzëqesh”, shkroi Fuga
Por Basha s’u tërhoq, duke vijuar me një tjetër status. “Edhe me vaksinat e njëjta histori si me dështimet e Ramës këto 7 vjet. Premtoi 300 mijë vende pune dhe shtoi papunësinë dhe varfërinë, rriti koston e jetës dhe shkatërroi ekonominë. Vaksina më e mirë për Shqipërinë është largimi i Ramës. Vetëm kjo do na lëvizë nga dështimet drejt suksesit, nga dëshpërimi drejt shpresës”, ishin fjalët e Bashës.
Më herët, në shpalljen e faktit se Shqipëria kishte siguruar sasinë e parë të vaksinave nga Pfizeri amerikan, Rama ofroi dhe kohën se kur dhe ku nis vaksnimi.
“Ka nisur puna për qendrat e vaksinimit në Shqipëri. Qendra e parë do të jetë ajo e Tiranës në Air Albania, ku brenda pak ditësh gjithçka do të jetë gati. Fushata e vaksinimit do të ketë moton ‘Shqipëria buzëqesh’.
Do t’i kthejmë Shqipërisë buzëqeshjen e marrë peng vitin e shkuar nga armiku i padukshëm. Vaksina do të jetë falas dhe jo e detyrueshme por padyshim e këshillueshme për të gjithë”, tha ndër të tjera kryeministri. /tesheshi.com/
