Nga Blendi Gashi
Edhe pse Kosova është një vend tejet i varfër dhe me një papunësi alarmante, kjo aspak nuk u pengon politikanëve, qoftë atyre në pushtet dhe opozitë që të shpenzojnë para për luks.
Një prej problemeve të mëdha është edhe (keq)përdorimi i veturave zyrtare.
Ata shpenzojnë mijëra litra karburant brenda një periudhe tejet të vogël kohore, dhe për këtë asnjëherë nuk japin përgjegjësi, kur dihet se jo pak kilometra me vetura zyrtare bëjnë edhe për punë private, gjë që shpeshherë është dëshmuar nga raportimet e mediave.
Përveç dikastereve qeveritare dhe kryetarëve të komunave që njihen për shpenzime të njohura të karburantit, aspak lehtë nuk e lënë as anëtarët e Kryesisë së Kuvendit të Kosovës, duke filluar nga kryekuvendari Kadri Veseli dhe anëtarët e tjerë.
Sipas të dhënave të publikuara nga Instituti Demokratik i Kosovës (KDI), organizatë kjo që përcjell punën e institucionit ligjvënës, për gjashtëmujorin e parë të viti 2016, anëtarët e kryesisë së Kuvendit me automjete zyrtare kanë shpenzuar hiç më pak se 8,314.62 litra karburant dhe kanë kaluar 72,756.00 kilometra.
Ndërkaq, shpenzimet për servisim dhe sigurim të këtyre automjeteve për këtë periudhë, janë në vlerë prej 5,823.70 euro.
Prijnë: Duda Balje, Firkim Damka e Kadri Veseli
Deputetja boshnjake e Kuvendit të Kosovës, Duda Balje, dhe deputeti nga grupi parlamentar 6+, Fikrim Damka janë anëtarët e kryesisë që kanë udhëtuar më së shumti me vetura zyrtare dhe normalisht kanë harxhuar më së shumti karburant.
Deputetët e lartcekur kanë udhëtuar 25.799.00 km për gjashtë e parë të vitit 2016-të, duke harxhuar 2.965.03 litra karburant.
Pas tyre, renditet kryekuvendari Kadri Veseli. Kreu i institucionit ligjvënës për gjashtë muaj ka udhëtuar me veturë zyrtare gjithësejt 13.384.00 km, duke harxhuar 2.155.50 litra karburant.
Pas Veselit, renditet bashkëpartiaku i tij, nënkryetari i parlamentit, Xhavit Haliti i cili ka udhëtuar me veturë zyrtare për gjashtë muaj 10.965.00 km, dhe ka harxhuar 1.328.04 litra karburant.
Më pas renditet Slobodan Petroviç, nga komuniteti serb, me 10.906.00 km udhëtim me veturë zyrtare dhe 1.235.05 litra derivate të shpenzuara.
Aida Dërguti nga Lëvizja Vetëvendosje, me veturë zyrtare për gjashtë muaj ka kaluar 10.735.00 km dhe ka shpenzuar derivate gjithësejt 494 .00 litra.
Më së paku nga të gjithë nënkryetarët e Kuvendit, me veturë zyrtare ka udhëtuar Sabri Hamiti nga LDK-ja, i cili ka kaluar me veturë 967.00 km dhe ka shpenzuar 137.00 litra karburant.
Nëse llogariten të gjitha udhëtimet e bëra nga anëtarët e Kryesisë së Kuvendit, del se ata të gjithë së bashku për gjashtë muaj kanë udhëtuar me vetura zyrtare gjithësejt 72.756.00 km dhe kanë shpenzuar 8.314.62 litra karburant. /tesheshi.com/
