PDIU i ka ofruar skenës politike shqiptare një ndër absurdet e këtij 25 qershori. Jashtë parlamentit i ka mbetur Mesila Doda, një ndër figurat më të fuqishme të saj, për shumë arsye dhe më e fuqishme në staturë politike dhe intelektuale se kryetari Shpëtim Idrizi, për t’u zëvëndësuar nga Reme Lala, një figurë krejt anonime, e njohur vetëm si vajza e Ymer Lalës, një personazhi prej “të fortëve” në Dibër, përmendur si i tillë dhe nga Sali Berisha në parlament, gjatë akuzave adresuar mazhorancës në fushatën elektorale për zgjedhjet e pjesshme lokale, muaj më parë. Dhe kjo ndodh në një vend nga ku Mesila Doda e ka origjinën, Dibër pra, megjithëse as njëra dhe as tjetra nuk janë çamë, por së paku znj. Doda e ka bashkëshortin të tillë, Enkel Demin.
Reme Lala, sapo ka marrë mandatin “ia ka kaluar” atë Edi Ramës si mbështetje, duke e përligjur këtë me premtimin se bashkë, pra ajo dhe Rama do e bëjnë realitet Rrugën e Arbrit.
Ndërkohë, zgjedhja e saj deputete forcon akoma dhe më tepër pozitat “ligjbërëse” të Ymer Lalës në Dibër. Dhe të mendosh se e gjitha kjo nuk ka asnjë lidhje me kauzën çame.
Siç Abdi Baleta do shkruante vite më parë, në fillimet e pluralizmit se “Ç’do Omonia në Lezhë?”, kjo vlen të thuhet dhe për PDIU-në e Idrizit: “Ç’duan çamët në Dibër?” (e thënë kjo politikisht).
