Serbia i kërkon Gjykatës së Hagës që të dërgojë të dënuarin për krime lufte, Radovan Karaxhiç në një nga burgjet serbe.
Siç bën të ditur e përditshmja e Beogradit Danas, asnjë nga vendet që kanë firmosur marrëveshjen e ekstradimit me Gjykatën Ndërkombëtare për Krime Lufte, nuk kanë bërë kërkesë formale për të ekstraduar Karaxhiçin në burgjet e tyre.
Ndërkaq Beogradi i ka dërguar një shkresë zyrtare Sekretarit të Përgjithshëm të OKB-së që të lejojë shlyerjen e dënimit në Serbi, të dënuarve që janë me shtetësi serbe.
Zëdhënësi i Gjykatës së Hagës, Nenad Golçevski, tha për gazetën Danas, se janë 17 vende të mundshme ku mund të dërgohet të vuajë dënimin ish-kreu i serbëve të Bonjës, Radovan Karaxhiç, i cili u dënua me 40 vjet heqje lirie për krime kundër njerëzimit.
Lista e vendeve ku Karaxhiç mund të dërgohet për burgim janë: Norvegjia, Suedia, Finlanda, Danimarka, Estonia, Polonia, Austria, Belgjika, Britania e Madhe, Franca, Spanja, Portugalia, Italia dhe Gjermania.
Holanda është përjashtuar, ndërkohë që ende nuk ka procedura të vendosura për njërin nga këto vende. Problemi është se nëse nuk do të ketë kërkesë për ta marrë të dënuarin në vendet përkatëse, atëherë situata bëhet komplekse dhe Haga duhet të vendosë ndërmjet Serbisë dhe 17 vendeve të tjera që të bëjë kërkesë zyrtare.
Siç bën të ditur Danas, Shqipëria, Sllovakia dhe Ukraina nuk kanë të drejtë të marrin të dënuar në vendet e tyre pasi nuk e kanë firmosur marrëveshjen e ekstradimit me Gjykatën Ndërkombëtare.
Burime diplomatike i thanë Danas-it se gjithsesi është shumë e vështirë të arrihet që Karaxhiç të rikthehet në Beograd, por qeveria serbe po negocion të gjejë një nga vendet ku i dënuari e gjen veten më komod. Siç mësohet, Gjermania konsiderohet si një shtet ku nuk do të ishte e përshtatshme që të transferohej krimineli i luftës, pasi mediat e këtij vendi mund të furnizonin publikun me lajme që mund të dëmtonin imazhin e serbëve. Diplomacia po punon që të shkojë tek një vend që Beogradi e konsideron aleat. /tesheshi.com/
