Kandidati i LDK-së për kryetar të Prishtinës, Arban Abrashi, dhe kreu i kësaj partie, Isa Mustafa, hodhën jo pak akuza në drejtim të kryekomunarit Shpend Ahmeti.
Abrashi është shprehur i bindur se do t´a kthejë Prishtinën nën qeverisjen e LDK-së, pasi sipas tij në katër vitet e fundit qytetarët janë përballur me probleme të shumta.
“Qytetari i Prishtinës ka problem me ngrohjen, ndriçimin, ndotjen akustike, ndotjen mjedisore, parkingjet, transportin. Unë si kryetar i ardhshëm do të merrem me këto problem, nuk do të merrem me çështje regjionale, ndërkombëtare apo ato që i takojnë qeverisë.
Konceptimi im politik dhe praktik për Prishtinën ka të bëjë që qytetari të jetë në fokusin tone, që të ndajmë hallet e brengat me ta, të gjejmë zgjidhje të përbashkëta që t’i ofrojmë njerëzve më të mirën”, tha Abrashi.
Kurse Mustafa u shpreh se Ahmeti ka bërë zhurmë për projektet që ishin kontraktuar në kohën kur LDK-ja drejtonte komunën, deri në fund të vitit 2013.
“Nuk është punuar gjatë këtyre katër viteve, është bërë shumë zhurmë, por nuk ka punë dhe projekte esenciale për Prishtinën. Është punuar vetëm në projekte që unë i pata kontraktuar më parë, siç kanë qenë ai i Termokosit, ose i ujësjellësit. Nuk është ndërtuar asnjë shkollë, është ndërtuar shumë pak nga infrastruktura”, tha Mustafa. /tesheshi.com/
