Kryeministri i Kosovës Albin Kurti tha se projekti i shkëmbimit të territorit dhe ndryshimit të kufirit të Kosovës kishte dështuar në dialogun me Serbinë, por se ideja nuk ishte e vdekur.
Në një intervistë me Sueddeutsche Zeitung, ai paralajmëroi se autoritetet e Kosovës duhet të tregohen të kujdesshme sepse vendime të tilla do të hapnin “Kutinë e Pandorës”.
Ai pretendon se nuk është kundër dialogut me Serbinë, por që, sipas tij, procesi duhet të bazohet në parime të qarta, detyruese për të dy palët.
“Serbia duhet ta pranojë realitetin: Kosova është një shtet i pavarur. Dhe ne nuk mund të kthehemi në kohën e Slobodan Millosheviçit. Sa më shpejt që ata ta pranojnë atë, aq më mirë për të dy palët,” tha Kurti.
I pyetur në lidhje me idenë e bashkimit të Kosovës me Shqipërinë, ai tha se vendimi duhet të merret nga qytetarët në një referendum në të dy vendet dhe se gjithçka “duhet të bëhet në mënyrë paqësore, demokratike dhe transparente”. /tesheshi.com/
